SERIAN: Bisi 41,800 Dagang Mikro, Mit enggau Jelan Pemesai (PMKS) di Sarawak udah nerima bantu dagang enggau semua penyampau manggai RM204 juta ari taun 2021 nyentuk 2025.

Kaban Kunsil Nengeri (ADUN) Bukit Semuja John Ilus madah, inisiatif nya digaga nengah macham program enggau skim bantu ari Opis Menteri Dagang Antarabansa, Industri enggau Pemeranak Puku Sarawak (MINTRED) dikena nyaup PMKS di nengeri tu mengkang puh, kompetitif lalu ulih mansang ngagai tikas ke tinggi agi.

"Program pemansang kapasiti enggau promosyen bela udah nyaup lebih 28,000 PMKS dikena nyungkak pengelandik sereta ngerembaika agi dagang ngagai renggat nasional enggau antarabansa,"ku iya madah.

Iya bejaku munyi nya maya bejadika Program Jum REGISTA Bisnes renggat Pelilih Serian ditu, Hari Satu.

Ku iya, sebagi ari iniasiatif ke digaga perintah nyengkaum Program Graduan ke Arah Keusahawanan (GERAK), Orang Dagang Teknikal enggau Vokasional (USTEV), Program Go Digital, Skim Kredit Mikro Sarawak (SKMS) enggau Skim Jali Industri Mit enggau Jelan Pemesai (SPIKS).

Maya nya mega John madah, program Jum REGISTA Bisnes siti pelasar ke besai reti dikena nyaup orang dagang lebih agi ba menua pesisir dikena ngerejista dagang sida.

"Nengah program tu sida ukai semina disaup ba pekara bekaul ngerejista dagang tang bela diterangka enggau pekara ngatur sereta peluang ngaga jali belanja ari macham agensi enggau institusyen wang," ku iya madah baru.

Ku iya, Perintah Sarawak bela ngerembaika agi pengawa ngelaku produk menua tu ngagai menua bukai nengah penumbuh Opis Dagang enggau Dagang Temuai Sarawak di Singapura (STATOS) enggau Opis Dagang enggau Dagang Temuai Sarawak di Brunei Darussalam (STATOB) kelimpah siti agi opis dagang di Pontianak ke diatu benung ba renggat penudi nentu palan ke engkeman. -EDISI UKAS