SEMOP: Rayat ba menua tu dipinta semampai nyikap diri napi pemansang ke majak nyadi ngambika bela ngasaika asil ubah nya.
Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol madah, macham bengkah projek pemansang dilanggur sereta digaga dikena nyungkakka agi pengerembai sosioekonomi menua nya.
"Tu nyengkaum projek ngaga Jematan Batang Paloh, Balai Mensia Mayuh Pulau Bruit, Masjid Semop, Tamu, kedai makai enggau begunan kedai," ku iya.
Iya bejaku munyi nya ba Pengerami Ramah Tamah Aidilfitri 2026 ke diatur Palan Servis ADUN Semop enggau Palan Servis Parlimen Tanjung Manis ba Kampung Kut, Daro, Hari Satu tadi.
Iya ke mega Kaban Kunsil Nengeri (ADUN) Semop madah, lebih RM9 juta diungkupka dikena ngaga tiga iti projek ba Kampung Semop, Kampung Saai enggau Kampung Kut ke diatu udah tembu.
Nangkan nya, Kaban Parlimen Tanjung Manis Dato Ir. Yusuf Abdul Wahab ngenataika jaku pengaga ati ngagai nembiak Pulau Bruit ke udah bulih pemutus nyulut ba peresa Sijil Pelajaran Malaysia (SPM).
Iya mega ngena awak nya ngelalau mensia mayuh ngambika semampai bekelimatka belanja nyerumba gaya ekonomi maya tu bisi dikeruga penanggul global.
Ba pengerami nya macham program bisi diatur baka nyuaka duit rayat enggau tikit benasit.
Pengerami maya nya tau bendar ngenegapka kaul tuai enggau rayat ti bela nyadi pelasar ngenataika penerang bekaul pemansang. -EDISI UKAS
