JULAU: Bungkur internet di sitak Kunsil Nengeri (DUN) Meluan diatu manggai 100 peratus, lalu nya nyungkak akses digital enggau ngedut seraka entara menua pesisir enggau mengeri.

Kaban Kunsil Nengeri (ADUN) Meluan, Dato Rolland Duat Jubin madah, perengkaguna nya ngasuh rayat ulih akses servis perintah nyengkaum minta enggau ngapil nengah tali arus ti muntang enggau inklusif agi.

“Rayat ulih nganjung peminta tauka ngapil sekali ke ngena tali arus tauka datai batang tubuh ngambi nadai rayat tinggal ba pemansang,” ku iya.

Iya nyebut pekara nya lebuh dirandau pengudah bejadi Program E-Invois enggau Kaunter Luar Bantu Mata Duit Perintah ba Balai Komuniti Julau, Hari Lima.

Sepenyampau 186 Tuai Raban Bansa enggau Tuai Komuniti ari selampur sitak DUN Meluan sama datai ungkup nambah penerang ba renggat baruh.

Ku iya, infrastruktur telekomunikasyen majak manah ba menua ulu nyaup ngerembaika penerang perintah ngagai rayat ti serap agi.

Iya mega meri terima kasih ngagai Perintah Sarawak enggau Perintah Besai ti seruran gawa ngaduka perengkaguna digital ungkup pengelantang rayat menua pesisir.-EDISI UKAS