PADAWAN: Enam ruang bilik di Kampung Annah Sibakar diatu disikap rumah ti lantang agi pengudah rumah sida diseruri nengah program rumah miskin, lalu mandangka pengeran Perintah Sarawak nyaga pengelantang komuniti menua pesisir.

Sapit Menteri Pengangkut Sarawak (Langit enggau Darat), Datuk Dr Jerip Susil madah, bantu nya diagih chara beselinting enggau ngenulu raban ti amat begunaka bantu nyengkaum orang tuai, orang timpang pendiau enggau indai tunggal.

Ku iya, taja penyampau peminta ti diterima tinggi, bantu meseti diagih sebela nentuka sida ti pemadu beguna diberi perati.

“Kitai ngenulu sida ti diau ba tebing tasik baka Annah Sibakar, Sadir, Sibuang enggau Simuti ngambi nadai raban dikelaung ari ngasai perengkaguna pemun ti menyana agi,” ku iya.

Iya madah munyi nya lebuh bejadi Rumah Sembiang sereta Pengerami Man Tubi Jauh (Makai Berau Baru), ditu kena Hari Enam.

Nambah ke nya, iya ti mega Kaban Kunsil Nengeri (ADUN) Mambong madah, pengawa nirika rumah sembiang ba genturung pendiau nya nyadi penyungkak negap penyerakup komuniti kelimpah nyadi palan ngempung komuniti menua.

“Rumah sembiang ukai semina palan besembiang, tang mega nyadi pelasar nempa komuniti ti seati, beretan enggau progresif agi,” ku iya.

Iya mega madah, institusyen pengarap baka gerija ngembuan besai guna narak reti penyerakup sereta nyaup komuniti napi pemar pengidup ti lantang agi. - EDISI UKAS