Pejalai Ngabas Rumah Panjai Negap Agenda Pemansang Menua Pesisir
SARIKEI: Pejalai ngabas sekeda rumah panjai ba Parlimen P.208 Sarikei terus negap agenda pemansang menua pesisir lalu meri perati ngagai perengkaguna pemun peranak sereta nambah infrastruktur penyambung darat.
Sapit Menteri Pengeraja Asal enggau Pemeruan Rampa Menua ti mega Kaban Parlimen Sarikei enggau ADUN Repok, Dato’ Sri Huang Tiong Sii madah, pemansang jalai ti menyana ulih ngeranchak ekonomi menua pesisir sereta ngubah tikas idup komuniti menua.
Ku iya, infrastruktur ti menyana agi diatu nya asil pengeransing perintah nentuka pengelantang rayat terus dijaga.
“Nyadi pengari rayat, aku deka terus ngabas ngambi mereti ke peminta komuniti.
“Pemansang perengkaguna pemun beguna amat lalu meri empas besai ngagai pengidup peranak besehari-sehari,” ku iya.
Iya madah munyi nya lebuh ngatur pejalai ngabas sekeda rumah panjai ba Sungai Petai, Jalai Kwong Ming/Minah enggau Sungai Selangan, kena Hari Enam.
Entara rumah panjai ti diabas iya nya Rumah Pitre Ambit Ak Tayup, Rumah Jugah Ak Dunggat, Rumah Banun Ak Ansi, Rumah Nyalau Ak Mamat, Rumah Bansa Ak Nanggal sereta Rumah Sabah Ak Sawong.
Ba pejalai ngabas nya, iya mega nyua bantu projek pintu ngagai 142 pintu rumah panjai ngambi dikena peranak lalu mandangka pengeran perintah semampai mantu komuniti menua pesisir.
Ngenang silik, iya meri terima kasih ke sukung rayat sepanjai lebih 10 taun iya gawa nyadi pengari rayat dia.
Ku iya, mayuh projek pemansang udah dipejalai nyengkaum nyeruri jalai ba pasar enggau menua pesisir, sistem parit, ngaga jalai ke rumah panjai sereta nyemin jalai genturung dikena ngemuntang pejalai peranak mindah ke bukai.
Nangkan nya, Tuai Rumah Pitre Ambit meri terima kasih ke pengeransing Dato’ Sri Huang Tiong Sii mai pemansang ngagai endur nya.
Iya nandu, mayuh perengkaguna nyengkaum sekula, rumah sembiang enggau infrastruktur pemun udah diseruri lalu nyungkak pemansang ekonomi betanam betupi sereta pengelantang komuniti.
Kelimpah ari nya, iya mega meri terima kasih ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg laban udah mai pemansang kelebih agi nyeruri rentayan jalai sereta bejalaika projek infrastruktur ti meri pemaik ngagai rayat di Sarikei. - EDISI UKAS
