Infrastruktur Nadai Feri Nyaup Rayat Napi Ungkus Niki
SRI AMAN: Pengawa ngaga rentayan jematan di Sarawak nyaup ngurangka pengawa bepanggai ngagai servis feri lalu nyaga rayat ari empas rega bahan api niki.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, penyadi isu global nyengkaum penyarut antarabansa ulih ngeruga jalai dagang lalu ngujungka rega diesel niki ngenyit.
“Nasip endar kitai udah belabuh ngaga mayuh jematan. Batang Lassa udah nadai feri, Baram enggau Marudi mega nadai feri lalu enda lama da Batang Lupar 1 mega nadai agi ngena feri belabuh bulan Mei tu.
“Tu mai reti, pengudah nadai feri, kitai nadai bepanggai ngagai diesel,” ku iya.
Iya madah munyi nya ba Pengawa Nangguh Forum Ekonomi DUN Lingga 2026 ditu kena Hari Minggu.
Ku iya, sebedau tu perintah nengeri nyau melanja ungkus tinggi ngena diesel ungkup operasyen nyengkaum mansutka kuasa enggau servis feri.
Tang, nengah pengawa ngaga jematan baka di Batang Lupar enggau endur bukai, rayat diatu ulih nengah jalai darat lalu enda ibuh bepanggai ngagai feri ti ngena diesel.
“Enti kitai nadai tinjau penemu enggau besikap tumu, kitai deka napi pemar laban feri ngena diesel,” ku iya baru.
Iya mega madah, inisiatif tumu perintah merambu pemansang infrastruktur nya nyata meri pemaik besai ngagai rayat, kelebih agi ngelempung tating belanja idup.
Sama datai, Menteri Utiliti enggau Telekomunikasyen Sarawak, Dato Sri Julaihi Narawi, Sapit Sekretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel, Kaban Kunsil Nengeri (ADUN) Lingga, Dayang Noorazah Awang Sohor sereta Residen Bagi Menua Sri Aman, Mahra Salleh.
Ba lansa bekaul, iya mega madah entara perambu ba Sri Aman nyengkaum ngaga balai suarah baru ti disikap teknologi moden endur ngatur seminar, forum enggau aktiviti komuniti.
Forum Ekonomi Lingga ti diatur pengelama dua hari nya dikena ngerembai akses peranak ngagai peluang pemansang, kelebih agi ba sektor digital, teknologi gadung, betanam betupi moden sereta rentayan belajar. - EDISI UKAS
