KAPIT: Pengerami melah pinang anak Menteri Kereja Raya ti mega Kaban Parlimen Kapit, Dato’ Sri Alexander Nanta Linggi richah diatur, lalu nyadi pelasar negap kaul entara tuai enggau komuniti menua.

Pengerami ti diatur ba Balai Suarah Kapit nya ngempuru serap komuniti nyengkaum temuai dipebasa nengeri enggau tuai menua.

Bela datai iya nya Sapit Menteri ba Opis Premier Sarawak (Undang-Undang Adat enggau Bumiputera) ti mega ADUN Bukit Goram, Datuk Jefferson Jamit Anak Unyat; ADUN Pelagus, Wilson Nyabong Ijang sereta Sapit Menteri Digital ti mega Kaban Parlimen Hulu Rajang, Datuk Wilson Ugak Kumbong.

Pengerami dipun enggau penatai pengantin sebedau dientudi pengerami makai lemai sereta pemerindang baka tanda enggau mandangka video.

Bisi mega bejaku iya nya Wilson Nyabong Anak Ijang ti mega aya pengantin indu, dientudi Dato’ Sri Alexander Nanta Linggi ti nyadi apai pengantin indu sereta Datu Dr. Lulie Melling ngari ke ruang bilik pengantin lelaki.

Pengerami nya richah agi enggau pengawa nyirap kek enggau ‘champagne toast’ ti diulu ke Datuk Jefferson Jamit Anak Unyat, ditangkan pengawa begambar sereta pemandang bungai api.

Pemujur pengerami nya mandangka semangat beserakup sereta pengelantang komuniti di Kapit lalu negutka agi kaul rat entara tuai enggau rayat. - EDISI UKAS