Taga Pejalai Kuching–Sri Aman Pandak Agi Ngagai Sejam 15 Minit
SRI AMAN: Taga pejalai ari Kuching ke Sri Aman disadang pandak agi ngagai sejam nyentuk sejam 15 minit dudi hari, dibanding urung dua jam 30 minit naka diatu.
Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, selinting nya bepelasarka taga pejalai baru penyauh 142 kilometer nengah Sejingkat, Samarahan enggau Sebuyau ti deka disukung enggau ngaga infrastruktur nyengkaum jematan.
“Saut aku nyamai aja, ari Kuching nengah Sejingkat lalu nengah penembu jematan Sejingkat terus ke Samarahan, ke Sebuyau nyentuk Sri Aman, penyauh 142 kilometer.
“Enti kitai ngena entukar pengelaju urung 90 kilometer sejam, tu mai reti kitai ulih datai ba timpuh urung sejam 10 nyentuk 15 minit,” ku iya.
Iya madah munyi nya ba Pengawa Nangguh Forum Ekonomi DUN Lingga 2026 ditu, kena Hari Minggu.
Ku iya agi, pengawa nginsur taga pejalai nya ukai semina anggar, tang bepelasarka perambu sereta data jalai ti benung dikemansang.
Ku iya, perengkaguna nya disadang nyempil kaul ekonomi entara Kuching enggau Sri Aman, seraya meransang pemansang ngelingi endur nya.
Sama datai, Menteri Utiliti enggau Telekomunikasyen Sarawak, Dato Sri Julaihi Narawi; Sapit Sekretari Perintah Sarawak (Perambu Ekonomi enggau Pemansang), Dato Sri Dr Muhammad Abdullah Zaidel; Kaban Kunsil Nengeri (ADUN) Lingga, Dayang Noorazah Awang Sohor sereta Residen Bagi Menua Sri Aman, Mahra Salleh. - EDISI UKAS
