LIMBANG: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg nandu pengawa ngundang rayat nengah program walkabout di Tebing Sungai Limbang kena Hari Enam.

Program diatur pukul 6.30 pagi nya meda Premier enggau bala bukai mupuk bejalai ari Purnama Hotel ngelawa Muzium Limbang, seraya nyapa peranak ti sama ngerichah sepanjai jalai tebiang ai nya.

Sekumbang ke bejalai, Premier disapa peranak ari mayuh serak umur, lalu nya mandangka kaul rat entara bala tuai enggau rayat di limbang.

Tembu program belepa nya, Premier enggau bala bukai sama ngetu ngirup pagi di Tamu Limbang, kelimpah berandau enggau bala ti sama ngirup dia.

Sama datai, Sapit Menteri Besai Malaysia, Datuk Amar Fadillah Yusof, Sekretari Perintah Sarawak enggau Chairman Pengatur Sarawakku Sayang 2026, Datuk Amar Mohamad Abu Bakar Marzuki, Sapit Menteri Ba Opis Premier Sarawak (Undang-Undang, MA63 enggau Kaul Nengeri-Perintah Besai), Datuk Sharifah Hasidah Sayeed Aman Ghazali, Sapit Menteri Industri Pemakai, Komoditi enggau Pemansang Kandang Menua Sarawak, Datuk Dr Abdul Rahman Ismail eereta Sapit Menteri Pengangkut Malaysia, Datuk Hasbi Habibollah.

Kaban Kunsil Nengeri (ADUN) Batu Danau, Dato Paulus Gumbang, dua Sapit Sekretari Perintah Sarawak Datu Hii Chang Kee (Operasyen) enggau Datu Felicia Tan Ya Hua (Administrasyen), bala tuai opis enggau kaunselor ba Kaunsil Pelilih Limbang sama datai.-EDISI UKAS