Pedagang Ikan Bulu Sri Aman Gagit Premier Sarawak Ngabas Reruai Ba Program Forum Ekonomi DUN Lingga
SIMANGGANG: Gagit enggau kesal ati entara pengasai pedagang Opah Delitaste Sri Aman, Nur 'Izzati Zalaluddin lebuh reruai iya ti nyual produk pemakai ikan bulu dilawa Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ba Pengawa Nangguh Program Forum Ekonomi Kunsil Nengeri (DUN) Lingga di Balai Suarah Sri Aman kena Hari Minggu.
Lebuh dirandau, indu nya madah kediri enda nyangka Premier Sarawak sanggup ngelimpang awak diri pengelama lima minit berati ke produk pemakai ikan bulu iya ba reruai Opah Delitaste tauka ODEL lalu nanya bekaul chara ngaga produk nya.
“Aku enda nyangka deka nyadi orang keterubah dirandau iya.
“Ba reruai ODEL, Premier Sarawak nanya aku baka ni ngaga produk pemakai ikan bulu tu lalu baka ni teulihka penemu ngasilka produk nya.
“Lebih ngerindu ati lebuh Premier maya bejaku ba pengawa nangguh nya suah nyebut pasal produk ikan bulu ti bisi pengulih ba makit,” ku iya.
Nangkan nya, Nur 'Izzati madah, Forum Ekonomi DUN Lingga diatur Gerempung Anak Perantau Simanggang enggau kerejasama Opis Residen Bagi Menua Sri Aman nya udah nyaup meri penerang bekaul peluang ti disediaka agensi nengah Perintah Sarawak dibanding Perintah Besai.
Ku iya baru, forum nya mega udah meri peneleba enggau penemu baru ba renggat baruh ke alai produk dijual ODEL mujur narit perati pengusung ari luar.
“Forum tu udah nyaup ngelaku dua produk ODEL iya nya 'The Bold Buls' Ikan Bulu Masak Kicap Pedas ti diasil bepelasarka pemakai asal raban bansa Melayu enggau 'The Bold Buls ' Ikan Bulu Masak Lempah Terung Asam’ ti diasil bepelasarka pemakai asal raban bansa Iban.
“Timbal bala pengusung chukup ngemantup ati lebuh 118 ari 148 produk pemakai ikan bulu nya mujur dijual ba timpuh dua hari ngatur Forum Pemansang Ekonomi DUN Lingga tu," ku iya.
Nur 'Izzati ngelalau semua nembiak berani ngaul diri ba dagang baru ngambi meri peneleba kelimpah nambah ekonomi diri enggau ruang bilik sida.
Nur 'Izzati diatu bisi siti Hab Nginjin Produk Bepelasarka Ikan Bulu bepalan ba Kampung Pasir Panas Sri Aman enggau nginjin 250 kilogram ikan bulu ti dibeli ari orang berikan berega RM25 sekilo dikena ngasilka 200 produk ulih diempa terus (Ready To Eat/ RTE) enggau untung manggai RM3,000. -EDISI UKAS
