KKOU 2.0 Nyagu Pesaka Asal Orang Ulu, Ngangkat Ekonomi Komuniti Indu
MIRI: Pengawa nyagu pesaka budaya Orang Ulu terus ditegap nengah ngatur Pengerami Makai Lemai Kraf Kreatif Orang Ulu (KKOU) 2.0 ti ukai semina nyagu penyelai tradisyen, tang mega ngerandang peluang nambah ekonomi kelebih agi ngagai indu menua pesisir.
Pengerami besuluka jaku Pesaka Gah: Penyelai Tradisyen Orang Ulu nya richah diatur ba siti hotel tebilang ditu ti digulu urung 400 temuai, ngempuru pemekuh seni kraf, pedagang sereta tuai komuniti.
Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan madah, inisiatif baka nya beguna amat nentuka pesaka asal komuniti Orang Ulu terus dijaga seraya meri rega tambah ngagai ekonomi komuniti.
Ku iya, belanja sepenyampau RM20,000 ti diagih sebedau tu udah dikena kelab Indu Berwawasan Baram enggau manah nengah ngatur kus nganyam kantung senupat ba sekeda menua ulu nyengkaum Long Kesseh, Long Miri, Sungai Apoh enggau Long Pilah.
“Program tu ukai semina nyaga seni tradisyen, tang mega mujur nempa penyereta ti ulih nambah penatai pemisi kediri empu nengah asil kraf sida,” ku iya lebuh bejadi pengerami nya kena Hari Enam.
Ku iya, pemujur bala penyereta nya bukti sekeda ari sida mujur rembus ngagai pelasar ti besai agi nyengkaum ngaul diri ba program pisin tebilang di Miri sebedau tu.
Berebak enggau nya, iya madah ke ikon biak kreatif ti ngambi bagi nya inisiatif positif nempa rentayan strategik entara pedagang kraf menua enggau pemekuh industri kreatif ti besai agi.
Pia mega, pengawa nyua Anugerah Inspirasyen Kraf Kreatif enggau Anugerah Penyereta Kus Kraf Pemadu Manah 2025 kelai ngenang sida ti udah nyulut ba bidang nya.
Sama datai, Kaban Kunsil Nengeri (ADUN) Telang Usan ti mega Pemungkal Kelab Indu Berwawasan Baram, Dato Dennis Ngau, Datuk Bandar Miri ti mega ADUN Pujut, Adam Yii Siew Sang sereta Temenggong Elizabeth Deng. - EDISI UKAS
