BAU: Penau indu nyadi pugu pemansang komuniti ti meseti terus ditegap ngambi ulih nyukung mayuh sektor, nipak arus pemansang nengeri.
Sekretari Raban Indu Parti Pesaka Bumiputera Bersatu (PBB) Sarawak, Senator Susan Chemerai Anding nyemetak madah ke pangku pengawa indu nadai agi ditatak ba institusyen ruang bilik aja, tang diatu nyadi penyungkak besai pemansang komuniti enggau sosioekonomi.
Ku iya, indu meseti berani ngaga ubah, nambah penau diri sereta ngerebut peluang ti disedia nentuka sida mengkang relevan ba landskap pemansang kemaya hari.
”Indu kemaya hari mangku pengawa besai nyadi tulang belakang ruang bilik lalu nyadi agensi pemansang komuniti.
“Nya kebuah, sida meseti berani nyingkang lalu semampai sedia napi pemar,” ku iya.
Iya madah munyi nya lebuh ngulu Program Aktiviti Begulai Enggau Raban Indu, empai lama.
Nambah ke nya, iya mega ngemerat pemesai guna pangku pengawa indai negap pelajar anak kelebih agi nengah pemisi mayuh inisiatif pelajar pechuma ba renggat pelajar tinggi ti disediaka perintah.
“Pengeran indai nentuka anak bulih pelajar ti manah ukai semina ulih ngubah pengidup ruang bilik, tang mega nyungkak pemansang nengeri,” ku iya.
Iya madah baru, pengulih enggau penau indu meseti terus diansah ngambi ulih dikena manah nambah ekonomi sereta nyaga pengelantang komuniti.
Nangkan nya, Tuai Raban Indu PBB Pampang Serembu, Diana Dewing madah ke program nya nyadi pelasar beguna ngerapit kaul sereta negap pangku pengawa indu nadai ngira tirai juru.
Program nya diisi enggau mayuh aktiviti nyengkaum pekit nyumai enggau ngelagu bungai ti dipenggi Zon Kawa, kelimpah aktiviti aerodance enggau sukaneka ti mujur mayuh penyereta.
Program baka tu mandangka pengeran negap pangku pengawa indu nyadi agen ubah enggau bakih strategik ba pemansang komuniti ba renggat baruh. - EDISI UKAS
