Pengawa Nyiri Tuai Raban Bansa Ngemujur Atur Pengawa, Nyungkak Pemansang Lepo K
MARUDI: Pengawa nyiri Tuai Raban Bansa Kenyah Lepo K ti baru di Long Banga nyadi penyungkak besai ngemujur atur pengawa komuniti sereta nyungkak pemansang berurun agi ba ulu Baram.
Sapit Menteri ba Opis Premier Sarawak (Pengereja Kasar, Imigresyen enggau Patau Projek) ti mega Kaban Kunsil Nengeri (ADUN) Mulu, Datuk Gerawat Gala madah, pengawa nyiri tuai ari komuniti empu nya chara strategik nentuka atur ba genturung pendiau manah enggau nipak peminta komuniti menua.
Ku iya, sebedau tu Lepo K dipegai Tuai Genturung Pendiau Long Banga, tang pengawa nyiri Tuai Raban Bansa nya empu nentuka atur ti beselinting enggau nemban agi.
“Adat enggau budaya ti bebida entara komuniti Kenyah enggau Saban mega ngujungka tuai menua nyadi elemen begunan nentuka pengelantang sereta atur pengawa lanchar,” ku iya.
Iya madah munyi nya ba pengawa nyiri Tuai Raban Bansa Lepo K di Long Banga.
Iya mega madah, pangku pengawa Tuai Komuniti enggau Tuai Raban Bansa (KMKK) diatu majak signifikan nyadi penyungkak pemansang menua pesisir, ukai semina nyadi jematan entara perintah enggau rayat, tang mega nyadi pengemudi nentuka polisi perintah dibantai ke pemaik ba renggat komuniti.
Nambah ke nya, iya mega andal ke Tuai Raban Bansa baru, Sally Bungan Bat ulih ngesan tanggungpengawa enggau manah bepelasarka sukung komuniti sereta pengeran tuai menua.
Ngenang pemansang, iya nyemetak madah ke Perintah Sarawak naka ulih ngerumban pejalai infrastruktur ba menua ulu nyengkaum Long Banga enggau Lepo K, kelebih agi nengah pengawa nyeruri jalai batang ngagai jalai ti likun enggau bisi kualiti agi.
Kelai sukung tumu, iya mega ngagihka bantu RM7,000 ari agih belanja Projek Mit Pemansang Menua Pesisir (MRP) ADUN Mulu ngagai JKKK Lepo K.
Pengawa diatur JKKK Lepo K nya mujur enggau penuh adat sereta begulai, mandangka komuniti sedia nyingkang begulai enggau tuai baru nuju pemansang ti inklusif agi. - EDISI UKAS
