LUNDU: Sarawak chakah agi ngadu transformasyen sektor betanam betupi bekenaka teknologi moden enggau mekanisasi nyadi strategi nyungkak tikas belanja diri (SSL) beras nengeri ngagai abis nadai 60 peratus manggai 2030.
Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom madah, chara betanam betupi pintar nyengkaum ngena kereban, dron enggau sistem teknologi begulai meseti chakah dipejalai dikena nyungkak produktiviti sereta penyikar ngintu padi.
Iya nyebut pekara nya ba Pejalai Gawa Menteri Betanam Betupi enggau Jamin Bekal Pemakai Malaysia, Datuk Seri Mohamad Sabu ke Projek Bumai Padi Tanjung Purun, ditu, Hari Lima.
Iya mega madah, tikas SSL beras Sarawak diatu urung 21 peratus lalu begunaka pengawa ti patut ari ngena chara moden sereta gerempung bumai bedandang.
“Dikena ngamatka juluk tu, kitai patut ngalih ari chara lama ngagai betanam betupi moden ti efisien agi sereta besai, nyengkaum ngena manah teknologi digital ngatur pengawa,” ku iya.
Iya ngaku, pemar besai sektor nya nadai tanah ti besai sereta orang nembiak enda entu ngaul diri, nya kebuah chara baka pemansang agropark enggau negap betanam betupi pintar diperati ulih narit ati rebak baru.
Projek Bumai Padi Tanjung Purun mungkur urung 140 hektar pemesai dikelala entara inisiatif strategik bisi pengulih besai dikemansang nyadi sitak bumai padi komersial moden di Sarawak.
Projek nya mega ngena varieti padi moden nyengkaum padi hibrid GS-30 ti ulih nambah asil padi diketau enggau kualiti beras, lalu nya ulih nyaup nambahka produktiviti sektor padi nengeri.
Ba pejalai gawa sama, raban nya bisi ngelawa Ladang Nupi Undang PPES Seahorse di Rambungan sereta enggau orang ngelepauka anak undang kelai negap pemansang sektor akuakultur.
Sama datai, Menteri ba Opis Menteri Besai (Sabah enggau Sarawak) Datuk Ts Mustapha Sakmud, Kaban Parlimen Puncak Borneo Datuk Willie Mongin, Kaban Kunsil Nengeri (ADUN) Beting Maro Dato Razaili Gapor enggau Penyanding Penemu ba Opis Premier Sarawak (Industri Pemakai, Komoditi enggau Pemansang Kandang Menua) Tan Sri William Mawan Ikom. -EDISI UKAS
