DEBAK: Bala nembiak kelebih agi ba menua pesisir dipinta ngena manah peluang pelajar ti disedia dikena nempa pengidup ti menyana agi nipak pemansang nengeri.

Kaban Parlimen Betong, Dato Dr Richard Rapu madah, pelajar mengkang nyadi pugu besai nempa rebak besemekih seraya nyukung juluk pemansang Sarawak manggai 2030.

Ku iya, pengawa ngatur program baka P.204 Betong Education Fair 2026: Shaping the Youth’s Future meri awak ngagai nembiak, kelebih agi abis SPM enggau STPM merambu kuing tuju pelajar enggau terang agi.

“Pemandang pelajar tu beguna amat laban nya nyendia peluang ngagai nembiak ngulihka penerang terus ari institusyen pelajar tinggi sereta mereti ke pilih ti bisi pengudah tembu sekula,” ku iya lebuh bejadi program nya ba Sekula Sekondari (SMK) Saribas, kena Hari Enam.

Iya mega meransang nembiak anang semina bepanggai ngagai pejalai akademik aja, tang mega berani nyerungkai bidang Pelajar enggau Latih Teknikal enggau Vokasional (TVET) ti diatu majak nerima perati perintah.

Ku iya agi, Sarawak begunaka mayuh agi pengereja landik ba bidang strategik baka STEM, ekonomi digital, kuasa ulih dikena baru, kilang, bioekonomi, dagang temuai enggau ekonomi kreatif dikena nyukung pemansang ekonomi nengeri.

Berebak enggau nya, iya nyemetak madah ke bemacham inisiatif udah disedia perintah nengeri nyengkaum pelajar pechuma ba institusyen enggi Sarawak nentuka mayuh agi nembiak ulih nampung pelajar ngagai tikas tinggi agi.

Iya mega ngemerat pangku pengawa apai indai dikena meri sukung meruan ngagai anak sereta ngubah peragam bekaul suntuk belanja nyadi penekul nampung pelajar. - EDISI UKAS