KUCHING: Pengeran nyendiaka rumah bisi kualiti enggau ulih dibeli rayat Sarawak dikemerat, enggau Kaunsil Pemansang Pengawa Berumah (HDC) bejalaika pengawa besai ngamatka agenda nya.

Sapit Premier Sarawak ke mega Menteri Pengerai Mensia Mayuh, Pengawa Berumah enggau Perintah Lokal, Datuk Amar Prof Dr. Sim Kui Hian madah, pengawa seruran dipejalai nyengkaum bemacham pekara khas nentuka akses rumah ti lantang enggau ulih dibeli terus ditambah ungkup pengelantang rayat.

Iya nyebut pekara nya ba mua mayuh rambau Pengerami Ramah Tamah Raya HDC & Mutiara 2026 diatur Kelab Ngintu Pengelantang, Lumba enggau Rekreasyen (KKSR) di Wisma Sultan Tengah HDC, ditu, Hari Lima.

Iya madah baru, pengerami nya ukai semina ngerami Aidilfitri aja, tang mega nyadi pelasar beguna dikena negapka kaul sereta narak semangat segulai sejalai raban gawa enggau bakih strategik.

Naka diatu, HDC udah mujur nembuka 14 projek ngaul 924 unit rumah, seraya manggai 2030, juluk ditambah ngagai 27 projek enggau dipelaba 2,500 unit deka didiri.

Pengerami nya dipun enggau jaku pengelalu ari Chairman HDC, Abdul Yakub Arbi ti meri terima kasih ke semua pengiruh raban gawa nyukung juluk organisasyen nya.

Pengerami nya mega richah enggau bemacham pemakai Aidilfitri ti ngayanka pengelain budaya sereta ngerapit kaul begulai.

Batang pengerami sehari nya, chabut tikit benasip ti nambahka pengerichah bala ti datai berami.
Pengerami baka nya diatur dikearap nyadi penyungkak kaul tegap dalam organisasyen, lalu nyukung servis ti nemban agi ngagai rayat. -EDISI UKAS

Pemberita: Ezzah Syafiqah
Gambar: Ezzah Syafiqah,Naseem