KUCHING: Peminta tama ke kolej vokasional ngenyit nambah ngujungka kapasiti institusyen Pelajar Latih Teknikal enggau Vokasional (TVET) di menua tu patut ditambah.
Sapit Menteri Besai, Datuk Amar Fadillah Yusof madah, nya ngayanka ubah peragam penemu rayat ngagai TVET ti diatu dipilih nyadi pengawa, seriris enggau Polisi TVET Menua 2030.
Ku iya, pekara nya begunaka kapasiti, infrastruktur enggau pengajar patut ditambah ngambi tetangkupka peminta sereta guna industri ba pengereja landik.
“Rayat nyau nemu TVET diatu nyadi kedap pengereja pengawa. Tu ukai semina setipikit aja, tang penyikar teknikal enggau penemu pakar digital ti meri rega tambah ngagai ekonomi.
“Ari belajar chara praktikal, graduet TVET diatu nyadi penyungkak industri ti kompeten enggau versatil,"ku iya.
Iya nyebut jaku nya ba Pengerami Konvokesyen Kolej Vokasional Opis Menteri Pelajar Malaysia (KPM) Ke-10 2025 lalu bejadi nyua anugerah diploma ngagai bala graduet, di Hikmah Exchange, ditu, Hari Enam.
Iya madah, perintah seruran ransing ngelati TVET nengah kerejasama strategik begulai enggau industri nentuka latih ti disedia seruran relevan enggau peminta maya diatu.
Iya mega madah, pengawa nya beguna endar nentuka TVET terus nyadi penyungkak pemansang ekonomi menua sereta nyukung agenda transformasyen pengereja pengawa landik.
Sepenyampau 874 graduet ari 16 kus ti disedia nerima diploma ba pengerami konvokesyen nya kelai ngaku pemujur sida nembuka pelajar ba bidang TVET. -EDISI UKAS
