KUCHING: Strategi Pemansang Pengudah COVID-19 (PCDS) 2030 majak mansutka asil lebuh empas pemansang ti dilanggur diatu majak diasai rayat, lalu nya negapka kuing tuju Sarawak nyapai status kandang menua bepenatai pemisi tinggi manggai 2030.

Menteri ba Opis Premier Sarawak ke mega Presiden Parti Rakyat Sarawak (PRS), Dato Sri John Sikie Tayai madah, pemujur strategi nyata dipeda ari infratruktur nambah, industri baru sereta peluang ekonomi dikerembai ba selampur nengeri.

“Pemansang ti dipeda kitai sehari tu ukai semina lumur aja, tang ubah nyata ba pengidup rayat ari pengawa puang nyentuk ngangkatka tikas idup,” ku iya.

Iya nyebut pekara nya maya Konvensyen Gabungan Parti Sarawak (GPS) di Palan Konvensyen Borneo Kuching (BCCK) kena Hari Minggu.

Konvensyen nya udah dipenyadika Premier Sarawak ke mega Chairman GPS, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Iya nerang, projek strategik baka Jalai Besai Tebing Tasik, Jalai Besai Kedua sereta rentayan jalai menua pesisir udah nambahka rentayan penyambung, lalu nyempil takah pemamsang entara mengeri enggau menua ulu.

Kelimpah ari nya, Sarawak mega nurai pemansang signifikan ba sektor kuasa beresi lebuh nyadi entara pengemudi pemansang ekonomi hidrogen di rantau tu.

“Pemansang ukai semina projek fizikal aja, tang pengandal enggau pengidup dudi hari ti menyana agi ungkup tetiap anak Sarawak,” ku iya.

Iya nyemetak madah ke chara pemansang inklusif terus majak dikemerat nengah inisiatif dipejalai baka pelajar pechuma ba institusyen enggi nengeri, bantu barang diguna pemun sereta ngerembaika akses pengerai ke menua entigis.

“Sarawak benung angkat nyadi pengemudi kuasa ulih dikena baru lalu nyingkang maju ba ekonomi digital,” ku iya nyemetak.

Iya mega madah ke pemansang ti benung dijapai patut majak ditambah nentuka Sarawak ukai semina nyapai juluk 2030 aja, tang nyadi chuan pemansang inklusif enggau meruan ba renggat serantau.-EDISI UKAS

Pemberita: Lonney Jinab Doris