KUCHING: Rentayan jalai alun sereta bungkur utiliti ti majak besai terus nyadi penyungkak ngerumban pemansang menua pesisir di Sarawak, lalu nyempil takah perengkaguna entara mengeri enggau menua ulu.

Sapit Premier Sarawak, Datuk Amar Douglas Uggah Embas madah, bemacham inisiatif besai empas udah dipejalai, nyengkaum ngaga enggau nyeruri lebih 5,000 kilometer jalai menua pesisir dikena nambahka akses sereta rentayan penyambung rayat.

Ku iya, pengawa ti seruran digaga nya mega nambahka bungkur perengkaguna pemun mungkur bekal kuasa karan enggau ai beresi ti nyau deka serap menua selampur nengeri.

“Ba kandang menua pesisir, kitai nadai kala nejuka pemansang. Lebih 5,000 kilometer jalai menua pesisir udah digaga enggau diseruri.

“Bekal kuasa karan mega urung 70 peratus di Sarawak datai ari kuasa ulih dikena baru.

“Pia mega bekal ai, diatu udah ngelui 85 peratus di selampur Sarawak lalu nyau deka 100 peratus ba kandang menua pesisir,” ku iya.

Iya nibar ke jaku nya ba jaku pengelalu pengawa bejadi Konvensyen Gabungan Parti Sarawak (GPS) di Palan Konvensyen Borneo Kuching (BCCK) kena Hari Minggu.

Pengawa nya udah dipenyadika Premier Sarawak ke mega Chairman GPS, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Datuk Amar Douglas Uggah ke mega Menteri Infrastruktur enggau Pemansang Penyangkai Kapal Sarawak madah, projek infrastruktur besai digaga nyengkaum ngaga jematan meri empas signifikan ngambi peranak nyamai mindah, kelimpah enda kelalu bepanggai ba servis feri.

Ku iya, Sarawak diatu chakah ngaga 20 jematan besai enggau semua ungkus manggai RM6.5 bilion.

Iya nyemetak madah, chara perintah nengeri ngatur pemansang endang nyerangkung semua enggau inklusif, enda nyelinting mengeri aja, tang meri perati besai ngagai menua pesisir ngambi rayat ngasai perengkaguna ti sebaka.

Iya mega madah, pemujur bejalaika bemacham inisiatif nya asil kerejasama rat sereta semangat penyerakup pupu bansa di Sarawak.

Ngenang pasal konvensyen nya, iya ke mega Chairman Komiti Penyeraris Konvensyen GPS 2026 madah, konvensyen kedua kali nya nyagu sulu jaku “Post-COVID Development Strategy 2030: Visyen Nyadi Nyata” enggau ngempuruka 5,100 pengari ari selampur nengeri.

Ku iya, pengawa nya ngayanka selubang penemu enggau pengeran nuju pemansang inklusif enggau dudi hari Sarawak ti meruan.

Sama datai, Sapit Menteri Besai Datuk Amar Fadillah Yusof, Sapit Premier Sarawak ke mega Presiden Parti Sa’ati Rayat Sarawak (SUPP) Datuk Amar Profesor Dr Sim Kui Hian, Sapit Premier Sarawak Datuk Amar Awang Tengah Ali Hasan, Presiden Parti Rakyat Sarawak (PRS) Dato Sri John Sikie Tayai, Presiden Parti Demokratik Progresif (PDP) Dato Sri Tiong King Sing sereta pemesai bukai. -EDISI UKAS

Pemberita: Nur Nabilla
Gambar: Ameerul Syafiq Khir