MIRI: Program Sarawakku Sayang (SKS) 2026 deka ditandu ba sitak Miri kena 24 ngagai 26 April tu ba Stadium Miri ti deka dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg, Hari Enam.

Sekretari Perintah Sarawak, Datuk Amar Mohamad Abu Bakar Marzuki madah, program nya nyadi pelasar ngenataika polisi lalu nentuka rayat silik agi nemu inisiatif perintah.

Ku iya, program nya semampai ditambah manah ke bela disukung agensi perintah.

"Ke beguna iya nya rayat nemu nama ke digaga perintah lalu kaul perintah enggau rayat mega majak ditegap," ku iya.

Iya bejaku munyi nya ba aum media sepengudah betuaika aum pengatur Program SKS Sitak Miri 2026 ditu, Hari Satu.

Ke sekali tu, program nya disadang deka digulu 20,000 iku mensia mayuh enti dibanding urung 16,000 iku maya program diatur di Limbang sebedau tu.

Kelimpah disempulang program interaktif, mensia mayuh mega bisi peluang mai macham perais nengah e-pekit nyengkaum perais kereta Proton Saga.

Komiti pengatur bela bisi nyendiaka bas shuttle sepemanjai tiga hari program nya diatur.

Ba pekara bekaul, Datuk Amar Mohamad Abu Bakar bisi ngabas taba projek ngenalam Batang Baram di Kuala Baram.

Bela datai ba aum media nya, Sapit Sekretari Perintah Sarawak (Adminstresyen) Datu Felicia Tan, Residen Sitak Miri Galong Luang sereta bala tuai opis perintah ke bukai. -EDISI UKAS