KUCHING: Pemutus numbuh Muzium Pesaka Industri Brooke Dockyard mandangka pengeransing Perintah Sarawak ngangkat pesaka sejarah nyadi aset strategik seraya nyungkak pengerembai sektor dagang temuai nengeri.

Menteri Dagang Temuai, Industri Kreatif Enggau Seni Pemerindang Sarawak Dato Sri Abdul Karim Rahman Hamzah madah, dok kapal pemadu tuai di Malaysia nya digaga nyadi muzium bepelasarka pesaka industri ti bela nyaga enggau ngintu sejarah kelimpah tau ngerandang pun jalai baru ba pekara bekaul ekonomi.

ku iya, projek beungkus urung RM46.7 juta ke digaga kenyau ari taun 2020 nya diatu nyadi ‘arkib idup’ ti ngundan jerita ubah industri maritim Sarawak.

"Pengawa numbuh muzium tu ukai semina nambah siti agi palan dagang temuai, tang ngenegapka agi identiti sejarah Sarawak lalu nyadi pelasar pelajar nyengkaum ba bidang STEM," ku iya.

Iya bejaku munyi nya maya Pengerami Bejadi Muzium Pesaka Industri Brooke Dockyard ditu, Hari Satu.

Pengerami nya dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Iya mega madah, muzium nya deka nambah ekosistem dagang temuai maya hari tu nyengkaum Borneo Cultures Museum ti majak mandangka penyulut ke nerima penatai lebih 1.59 juta iku temuai kenyau ke udah dibuka ari Mac 2022.

Ku iya, ba timpuh tiga bulan keterubah taun tu aja, muzium nya udah nerima penatai lebih 54,000 temuai.

"Enggau tu kitai andal Sarawak ulih matak mayuh agi penatai temuai lalu deka bejadi juluk ati kitai matak 12.7 juta temuai ti deka mulaika penguntung ekonomi manggai RM50 bilion ba taun 2035," ku iya madah baru.

Bela datai ba pengerami nya, Sapit Premier Sarawak Datuk Amar Prof Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Menteri Pengangkut Sarawak Dato Sri Lee Kim Shin, Sapit Sekretari Perintah Sarawak (Pengatur Ekonomi enggau Pemansang) Dato Sri Dr Muhammad Abdullah Zaidel, raban Sapit Menteri sereta temuai dipebasa ke bukai.-EDISI UKAS