KUCHING: Pemutus numbuh Muzium Pesaka Industri Brooke Dockyard nyadi chara strategik dikena nyaga pesaka industri enggau sejarah maritim Sarawak, kelimpah bela nyungkak sektor dagang temuai nengeri tu.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, muzium nya ukai semina palan pemandang tang nyadi pelasar ke beguna dikena ngangkat naratif injiniring, dagang enggau sistem pengangkut ai ke kala nyadi kedap pemansang Sarawak dulu suba.
Ku iya, dok enggau replika kapal sejarah baka Zahora mandangka pengulih teknologi injin lama ke besai reti ba pengawa ngatur enggau pengangkut dulu menya di nengeri tu sebedau dunya moden agi.
"Sejarah mandangka kapal baka Zahora ukai semina pengangkut tang nyadi kelai ngatur enggau pengangkut ngagai menua pesisir nyengkaum kala dikena ba pengawa besai baka maya ngadu Suruhanjaya Cobbold kelia," ku iya.
Iya bejaku munyi nya maya bejadika muzium nya, Hari Satu tu tadi.
Iya mega madah, pemansang ba sistem pengangkut ari ngena kapal ngagai helikopter mandangka ubah pemansang enggau guna rentayan penyambung Sarawak ke besai.
Kelimpah ari nya, Premier Sarawak mega madah, langgur ngaga projek tebing sungai 48 kilometer pemanjai deka ngenyantil Brooke Dockyard ngagai Jematan Satok ti deka nyadi pematak temuai bepelasarka pesaka enggau budaya.
Iya madah, renggat keterubah projek nya disadang deka belabuh taun siti agi ngena belanja urung RM160 juta lalu ditangkan renggat kedua beungkus RM400 juta.
"Projek tu deka mai temuai ngasaika peneleba baru ti ngembuan sejarah, budaya enggau daya idup mensia mayuh ba sepiak-sepiak sungai nya," ku iya madah baru.
Ba pekara bekaul, iya mega madah, Sarawak diatu ngentapka penuduk diri ba renggat antarabansa bepun ari pemujur nerima gela global nyengkaum Palan Pesaka Dunya Taman Negara Gunung Mulu enggau Taman Negara Niah, kelimpah Kuching nerima gela mengeri gastronomi.
Bela datai ba pengerami nya, Sapit Premier Sarawak Datuk Amar Prof Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nassar, Menteri Dagang Temuai, Industri Kreatif enggau Seni Pemerindang Sarawak Dato Sri Abdul Karim Rahman Hamzah, Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom, Menteri Pengangkut Sarawak Dato Sri Lee Kim Shin, Sapit Sekretari Perintah Sarawak (Pengatur Ekonomi enggau Pemansang) Dato Sri Dr Muhammad Abdullah Zaidel, raban Sapit Menteri sereta temuai dipebasa ke bukai.-EDISI UKAS
