SARIKEI: Perintah Sarawak semampai nyaup pemansang ba rumah panjai ngambika ulih ngangkat tikas pengidup rayat di menua pesisir.

Sapit Menteri Ladang enggau Komoditi ke mega Kaban Parlimen Sarikei Dato Sri Huang Tiong Sii madah, tu ulih dipeda nengah projek pemansang ke majak diberi ngagai rayat.

Ba tuju tu ku iya, iya ngemeran pengawa ngabas rayat di menua ngambika semua projek ke diberi endang pulai ke penguntung ngagai rayat.

Iya bejaku munyi nya maya datai ngabas beberapa buah rumah panjai di Sungai Seleku, Sungai Bulat enggau Jalai Kim San, empai lama tu tadi.

Iya ke mega Kaban Kunsil Nengeri (ADUN) Repok madah, perintah nengah inisiatif baka Program Transformasyen Menua Pesisir (RTP) deka majak ke pengawa ngaga projek infrastruktur nyengkaum ngaduka jalai enggau sistem parit.

Kelimpah ari nya, Dato Sri Huang madah, pengawa numbuhka pemansang betandu begunaka sukung rayat empu ngambika semua langgur pemansang ulih digaga enggau mujur sereta datai ba tuju.

Maya pengawa nya, iya bisi datai ngabas Rh Jabu Selan enggau Rh Allin Ujang di Sungai Seleku, Rh Siti Nyadau enggau Rh Jawi Singki di Sungai Bulat enggau Rh Patrick Jingan di Jalan Kim San ti mungkur 208 pintu bilik.-EDISI UKAS