SINGAPURA: Sarawak Pavilion majak nyulut ba hari kedua Food & Hospitality Asia (FHA) 2026 di Singapore Expo, lebuh nerima mayuh pengusung enggau rikod interaksi dagang nyengala nambah dibanding maya hari bejadi.
Pavilion nya entara pematak bala pemeli enggau orang tengah antarabansa, lebih agi sida ti deka nyerungkai produk pemakai enggau ai irup nyelai ari Sarawak.
Reruai mega richah, enggau bala ti datai betanya sereta ngepun randau nuju kerejasama dagang.
Pemanah timbal nya asil ari pengawa nyeraris diadu Opis Dagang enggau Dagang Temuai Sarawak di Singapura (STATOS) ti nentuka operasyen pavilion lanchar kelimpah ngeripih dagang ti berurun agi.
Sepenyampau 19 chap dagang lokal digempuru ba perabung Sarawak Pavilion, mungkur mayuh kategori industri nyengkaum pemakai injin, ai irup, asil betanam betupi premium sereta pemakai rangkai enggau kuie manis.
Ba kategori ai irup, Foodtake Industries Sdn Bhd nyual ai irup, seraya Leaves Food Industries Sdn Bhd mai produk ai irup dalam pek 1 liter sereta ai irup dalam tin.
Dr Parveenss Global Sdn Bhd ngelaku ai teh, nyengkaum teh ari kemiding ti nyelai, lalu Beverages Marketing (S) Sdn Bhd nyual ai irup dalam tin enggau kordial.
Leyd Brewing Co narit ati enggau produk bir kraf ti nyelinting makit khas.
Ba kategori pemakai injin enggau utai kena nyumai, MUSC Food Industries Sdn Bhd nyual pes pemakai, sos enggau perenchah.
Pawada Food Industries Sdn Bhd mai produk ari lada Sarawak baka sos, sepur sereta lada leka, kelimpah pemakai dalam tin, enggau corned beef sereta sos lada chelum entara produk pemadu laku.
Produk lada mega ditegap Pepper Spice Sdn Bhd, Joeyees Trading Sdn Bhd sereta Sarawak Produces Industries Company ti bejual ke lada chelum enggau burak.
Seraya ba kategori asil betanam betupi enggau utai mata premium, Evergreen Eco Plantation Sdn Bhd ngelaku nanas Sarawak Gold SG1 bersama produk ili, seraya East Asia Palm Products Sdn Bhd nyual mentega champur.
Borneo Farming & Foods Sdn Bhd enda masau peluang mai produk berega baka sarang burung lelayang tau diempa enggau lia.
Kategori produk premium mega datai ari Borneo Stream Authentic ti ngelaku ikan empurau sereta ikan sungai, ti nyadi entara pematak di pavilion nengah pemesai ikan ti dijual.
Lalu kategori pemakai rangkai enggau kuie manis mega digulu 899 F&B Manufacturing Sdn Bhd ti nyual minyak sacha inchi, kombucha sereta ai irup botani.
Stampin Confectionary Sdn Bhd mega mai snek premium ari keju, lalu Supreme Indah Sdn Bhd nyual snek ari bulu babas sereta sambal.
Savextra Sdn Bhd bedagang ke biskut enggau kuie bulan, dientudi Rosfaniaga Services Sdn Bhd ngenah snek ari ikan.
Pemanah timbal diterima ba hari kedua tu ngayanka pengulih besai produk Sarawak rembus makit antarabansa, ari pengerindu bala ti meli enggau orang tengah sekumbang pengawa pemandang nya diatur..-EDISI UKAS
