TYT Sarawak Nerima Penemuai Basa Penerima Perais Nobel Fizik 2023
KUCHING: Yang di-Pertua Negeri Sarawak, Tun Pehin Sri Dr. Wan Junaidi Tuanku Jaafar enggau bni, Toh Puan Datuk Patinggi Fauziah Mohd Sanusi nerima penemuai basa penerima Perais Nobel Fizik 2023, Profesor Pierre Agostini begulai enggau delegit Institut Fizik Malaysia (MIP) di Astana Negeri Sarawak kena Hari Dua.
Penemuai basa nya nyadi pelasar besilih penemu bekaul pengerembai sains enggau teknologi, pemesai guna pansik saintifik sereta pemansang pengelandik dalam bidang Sains, Teknologi, Injiniring enggau Matematik (STEM).
Lebuh berandau, Tun Pehin Sri Dr. Wan Junaidi madahka pemesai guna ngelati pelajar, pansik enggau pemansang pengelandik dikena nentuka Sarawak ulih nempa mayuh agi saintis, pemansik sereta inovator bepengelandik tinggi enggau ulih besemekih ba tikas antarabansa.
Ku iya, pemansang siti-siti nengeri ukai semina bepanggai ba pengering ekonomi aja, tang bela disungkak penau rayat ngembuan penemu, ngemansangka penemu pakar sereta bisi asil ba utai ditemu sereta inovasyen teknologi kediri empu.
Berindik ari nya, iya madahka pemesai guna ngenegapka pelajar STEM sereta narak budaya pansik, runding kritis, kreativiti enggau nyerungkai penemu ba rebak biak Sarawak.
Tun Pehin Sri Dr. Wan Junaidi bela madahka diri andal ke Sarawak ulih nyadi palan penyulut sains, pansik enggau inovasyen seriris enggau juluk ati Perintah Sarawak ngemansangka ekonomi baru bepuguka teknologi tinggi, energi ulih dikena baru enggau modal mensia bepengelandik.
Iya mega nerima manah kerejasama rat entara institusyen pelajar tinggi lokal enggau universiti sereta institusyen pansik antarabansa dikena ngerembaika pengawa bekunsi penemu, pemansang penemu pakar enggau pansik begulai, lebih agi dalam bidang strategik baka teknologi kuantum, ‘artificial intelligent’ (AI) enggau industri beteknologi tinggi.
Berebak enggau nya, iya madahka pemesai guna nyendiaka pengawa puang profesional ke ngasuh bala saintis, injinia, lutur, pansik enggau pakar teknologi ngambi ulih datai ba tikas tinggi dalam bidang penemu pakar sida empu ke enda ibuh ngalih ngagai bidang administrasyen ngambi diaku enggau diberi gaji ke manah agi.
Tun Pehin Sri Dr. Wan Junaidi mega ngarapka pemujur tokoh saintis baka Profesor Pierre Agostini ulih nyadi peransang ngagai bala nembiak, pengelicha enggau pemansik biak Sarawak majak nyerungkai penemu sereta ngiga penemu baru enggau ngaga inovasyen ke meri pemaik ngagai komuniti enggau menua.
Profesor Pierre Agostini entara penerima Perais Nobel Fizik 2023 ketegal jasa pemungkal pengawa iya dalam bidang fizik attosaat ke ngasuh saintis ulih nungkap pejalai elektron dalam atom enggau molekul dalam timpuh ke pandak.
Bela datai, Presiden Institut Fizik Malaysia, Profesor Tou Teck Yong, Sekretari Mendam Opis Menteri Pelajar, Inovasyen enggau Pemansang Pengelandik Sarawak (MEITD) Datu Adana Jed, Sapit Sekretari Mendam Caroline Cleophas Joseph sereta Tuai Unit Dr. Cheong Yaw Liang.-EDISI UKAS
