JULAU: Mutar penanggul bekal ai ba sepanjai Jalai KJD entara kuing pemansang infrastruktur ai di Julau nengah projek ngadu sambung paip besai ke benung digaga.
Menteri Utiliti enggau Telekomunikasyen Sarawak, Dato Sri Julaihi Narawi madah, pengawa nya beguna endar dikena nambahka sistem sambung ai, lebih agi ba menua ke napi penanggul bekal ai.
“Kitai bela bejalaika pengawa mutar penanggul bekal ai tejanggal ke ngaul menua ba sepanjai Jalai KJD, nyengkaum Assan Nunggang, ari perambu ngaduka sistem sambung paip ke bisi,” ku iya.
Iya nyebut jaku nya ba Pengawa Bejadi Loji Meresi Ai Julau, ditu, kena Hari Satu.
Ku Dato Sri Julaihi, projek nya ngaul pengawa nganti paip besai disemin (MSCL) enggau diameter 600 milimeter ari Simpang Bintangor nyentuk Stesen Pengalak KJD.
Kereja ngadu nya diatu benung digaga lalu ditaga tembu Disember 2026 dikena nambahka penyikar sambung ai enggau mutar penanggul suntuk ai ditapi peranak.
Ngenang pekara sama, perintah nengeri mega merambu ngaga loji meresi ai baru ngembuan kapasiti 30 juta liter sehari (JLH) nengah Projek Bekal Ai Julau Pakej 2.
Dato Sri Julaihi mega madah, perambu pemansang nya diatu ba tikas perambu dikena besikap nambahka kapasiti ngeluarka ai beresi ba pelilih nya.
“Projek ngaga loji baru tu nyadi pengawa timpuh panjai dikena nentuka kapasiti pemansut ai beresi ulih ditambah seriris enggau penyampau tubuh peranak ke nambah enggau menua majak mansang jemah ila,” ku iya.
Ku iya, perambu nya beguna endar dikena nentuka bekal ai tetangkup peminta belama, seriris enggau pemansang Pelilih Julau.
Iya madah baru, Opis Bekal Ai Menua Pesisir (JBALB) Sarawak deka seruran matau pejalai projek infrastruktur ai dikena nentuka tetiap projek nitihka taga udah ditetapka.
Pengawa nya ngayanka perintah nengeri naka ulih negapka perengka guna bekal ai, lalu nambahka kualiti servis ngagai rayat ba mengeri enggau menua pesisir.-EDISI UKAS
