SIBU: Lebih 30,000 nembiak Primari Enam ba selampur Sarawak deka nerima enam bup modul enggau latih intensif pechuma belabuh Januari taun baru dikena negapka penyulut akademik sida.

Sapit Menteri Pelajar, Inovasyen enggau Pemansang Pengelandik I, Datuk Dr Annuar Rapaee madah, kereban belajar ke disediaka nengah Opis Menteri Pelajar, Inovasyen enggau Pemansang Pengelandik Sarawak (MEITD) nya mungkur subjek Matematik, Bahasa Inggeris enggau Sains.

Ku iya, modul nya bela diseraris enggau format Ujian Penilaian Program Dwibahasa Sarawak (UP-DLP) dikena mantu nembiak besikap enggau siti tuju.

“Inisiatif tu mungkur modul khas ungkup subjek Matematik, Bahasa Inggeris enggau Sains dikena negapka penyulut akademik nembiak.

“Kitai deka nyendiaka modul intensif enggau latih intensif mungkur 10 set tanya ke ngundan nya deka dikemaru ninting taun,” ku iya.

Iya nyebut jaku nya lebuh bejaku ngarika Menteri Pelajar, Inovasyen enggau Pemansang Pengelandik Dato Sri Roland Sagah Wee Inn maya Simposium Iringtuai Digital 2026 di sebuah hotel, ditu, Hari Satu.

Ku Datuk Dr Annuar, Opis Pelajar Nengeri Sarawak (JPNS) udah nisih, ngemendar enggau ngenukuka bup nya pengudah nengah pengawa ngemanah nitih penengkeman silibus.

Iya nerang, kereban belajar nya diatu benung dichelak lalu disadang tembu ungkup disadung ngagai bala nembiak nya bulan Januari ila.

Berebak enggau nya, iya bela nerima manah berita dibantaika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg bekaul perambu meri ‘smart board’ ba 1,400 sekula di selampur Sarawak.

“Aku arap endar kereban enggau perengka bantu digital tu pengawa mansang ke mua dikena nentuka nembiak kitai landik sereta pintar ba bidang sains enggau matematik," ku iya.

Sama datai, Sapit Direktor Pelajar Sarawak, Dr Les Met; Pegawai Pelajar Pelilih Sibu, Lau Ngie Tung; sereta Yang Di-Pertua Serakup Kepala Pengajar Malaysia Pampang Sarawak, Bazli Nahrawi @ Banju Omping.-EDISI UKAS