Sarawak Merambu Nambah 40 Peluang Belajar Perubat Di UNIMAS
KOTA SAMARAHAN: Perintah Sarawak merambu nambahka penyampau peluang belajar perubat khas ungkup anak Sarawak di Universiti Malaysia Sarawak (UNIMAS) ari 40 ngagai 80 endur dikena nempa mayuh agi lutur lokal ngambi tetangkupka peminta servis pengerai nengeri.
Premier Sarawak, Datuk Patinggi Tan Sri (Dr) Abang Haji Abdul Rahman Zohari Tun Datuk Abang Haji Openg madah, perambu nya ngaul pengawa nambahka 40 peluang belajar ke diperambu dipelanja nengah Yayasan Sarawak.
Ku iya, pekara nya udah dikerandau begulai enggau raban UNIMAS empai lama ke nyadi sebagi ari pengawa strategik perintah ngenegapka pemansang raban profesional pengerai lokal.
“Nya kebuah, empai lama aku udah ngatur randau enggau raban UNIMAS dikena nambahka peluang belajar perubat khas ungkup anak Sarawak ari 40 ngagai 80 endur, ari nambahka 40 da peluang ke diperambu dipelanja Yayasan Sarawak.
“Aku deka meda pengawa tu nyadi pengawa meranak puku strategik ngemansangka raban profesional pengerai lokal. Kitai ukai semina deka nambahka penyampau graduet perubat aja, tang nentuka Sarawak bisi lutur enggau pakar ke chukup, bisi kualiti enggau sedia meri servis ngagai rayat ba selampur kandang menua tu,” ku iya.
Iya nibarka jaku nya maya Pengerami Konvokesyen UNIMAS Ke-30, Sidang 3, di Arena Gemilang, Dewan Tunku Abdul Rahman Putra (DeTAR PUTRA), ditu Hari Dua.
Berebak enggau nya, iya madah, Sekularship Khas Program Perubat UNIMAS ke dipejalai nengah Yayasan Sarawak kenyau ari 2017 udah mujur nempa 200 graduet perubat anak Sarawak ke semua dipelanja perintah nengeri.
Ku iya, penerima sekularship ke mujur nembuka pelajar bela bepanggai ba sempekat servis pengelama 10 taun di Sarawak bepelasarka atur sempekat ke ditetapka.
Tuju sempekat nya nentuka pengawa meranak puku ba pelajar perubat meri pemaik timpuh panjai, lebih agi ngagai peranak menua pesisir enggau menua ulu ke begunaka akses ngagai servis pengerai.
Berebak enggau nya, bisi 41 nembiak perubat dipelanja Yayasan Sarawak entara graduet ke nerima master degree, lalu ngayanka penemban pengawa perintah meranak puku ba pemansang modal mensia.
Ari penyampau sida nya, dua graduet, Jasnita Anak Kent ari Rumah Anding, Sungai Melinau, Kapit enggau Nur Hafizah Auda ari Kampung Baru Tatau, bela nerima perati ari Premier Sarawak ke pemujur seduai nembuka pelajar ba bidang perubat.
Seduai nya dipelanja magang, endur diau ba kolej kampus sereta elaun belanja idup ninting taun nengah Yayasan Sarawak.
Seraya Premier Sarawak bisi madahka pemesai guna negapka pansik enggau penemu pakar pengerai lokal seriris enggau pemansang Palan Penyakit Berampit Sarawak (SIDC) sereta pengawa numbuhka Palan Riman Sarawak.
