KOTA SAMARAHAN: Perintah Sarawak setuju deka berundingka pengawa ngerembaika inisiatif Pelajar Tinggi Pechuma Sarawak (FTES) ngagai anak Sarawak ke belajar ba universiti perintah diempu Perintah Besai ke bisi kampus di nengeri tu.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, perambu nya dibantai berindik ari peminta raban universiti ngambi anak Sarawak ke nampung pelajar ba institusyen nya bela diperunding ampit pemaik FTES.

“Ketegal peminta Mandal Canselor, kitai udah berandau lalu sida merambu ngambika anak Sarawak ke belajar di universiti perintah diempu Perintah Besai ke bisi kampus di Sarawak bela diperunding dipasuk dalam program FTES.

“Aku setuju lalu enti kitai bulih mandat enggau kuasa baru, pekara tu deka diperunding ngambi dikemendar,” ku iya.

Iya nibarka jaku nya lebuh dirandau media pengudah ngulu Pengerami Konvokesyen UNIMAS Ke-30, Sidang 3, di Arena Gemilang, Dewan Tunku Abdul Rahman Putra (DeTAR PUTRA), Hari Dua.

Ku iya, berunding tumu ke perambu ngaul anak Sarawak belajar ba kampus universiti perintah nya di Sarawak, nyengkaum UNIMAS, Universiti Teknologi MARA (UiTM) enggau Universiti Putra Malaysia (UPM).

Taja pia, pengawa ngerembaika pemaik ngagai anak Sarawak ke nampung pelajar di universiti di Semenanjung Malaysia empai diputuska naka diatu.

“Reti nya, anak Sarawak ke belajar di Sarawak aja. Ke bukai belajar di Semenanjung anti dulu mih,” ku iya.

Iya mega nerang, FTES dipejalaika diatu ngaul 64 kus ke udah ditetapka, seraya bantu duit belanja bela diberi ngagai nembiak selampur Malaysia.

Bela datai, Sapit Menteri Pelajar, Inovasyen enggau Pemansang Pengelandik Sarawak (Pelajar), Datuk Dr Annuar Rapaee.-EDISI UKAS

Pemberita: Lonney Jinab
Gambar: Natalie Cherinie Johnny