Bantu Tumu Dianjung Nentu Pengelantang, Akses Long Lellang Diadu Jampat
MULU: Penyikar perintah ngatur mantu nentuka pengelantang 165 ruang bilik ngaul 482 peranak di Long Lellang dijaga berindik ari dua jematan besai ba menua nya jai.
Sapit Menteri ba Opis Premier Sarawak (Pengereja Kasar, Imigresen enggau Patau Projek), Datuk Gerawat Gala madah, pengudah nerima berita, mayuh pengawa diatur jampat nentuka peranak ti tepekul enda suntuk pemakai enggau utai diguna pemun.
Ku iya, entara menua kena penusah baka Kampung Long Lellang A enggau B, Ba Keramue, Long Kepang, Long Sabai, Long Main, kelimpah Sekula Primari (SK) Long Lellang enggau Klinik Pengerai Long Lellang.
“Perintah jampat ngatur pengawa nyeraris bantu tasah nyengkaum nganjung bekal pemakai enggau utai diguna pemun ngagai peranak ti tepekul,” ku iya ba siti penerang media, Hari Empat.
Iya ke mega Kaban Kunsil Nengeri (ADUN) Mulu, Opis Pengintu Pengelantang Mensia Mayuh (JKM) nengah Opis Pelilih Miri udah digerah ngerumban bantu, seraya raban Bomba ari Pengkalan Langit Kandang Menua Sarawak bejalaika operasyen nganjung bekal ngena empat penerebai kandang dua hari.
Operasyen nya mujur nganjung urung 8,700 kilogram bekal bantu ngagai menua ti tasah, lalu nentuka utai diguna pemun peranak chukup.
Ngenang pekara bekaul, Datuk Gerawat madah ke Opis Kereja Raya (JKR) mega lalu berumban bejalaika pengawa ngaduka jematan, ngambi jalai ulih ditengah entukar mit dulu.
Iya mega madah, perambu ngangkatka pemanah jalai Long Lellang nyengkaum dua jematan nya di baruh Highland Development Agency (HDA) diatu ba renggat nyerenih tinda.
“Projek tu disadang diberi enda lama da lalu kereja ngaga disadang berengkah pun bulan Jun taun tu mega,” ku iya.
Berebak enggau nya, iya mega meri terima kasih ngagai semua agensi ngaul diri nyengkaum Opis Pelilih Miri, JKM, Opis Bomba enggau Penyah Penusah Malaysia, JKR sereta voluntia lokal ti bejalaika pangku pengawa besai nentuka bantu ulih diterima peranak.
Datuk Gerawat nyemetak madah ke perintah nengeri matau sereta nentuka pengelantang rayat seruran dijaga. –EDISI UKAS
