MIRI: Program Sarawakku Sayang Bagi Menua Miri 2026 berengkah diatur ari 24 nyentuk 26 April tu di Stadium Miri enggau bemacham isi program ti narit ati ngempung rayat datai bebala mayuh.

Pengawa mantar bejadi program udah dipenyadi Sekretari Perintah Sarawak, Datuk Amar Mohamad Abu Bakar Marzuki kena Hari Lima.

Dulu ari nya, iya bisi limpang ngabas reruai raban pemandang ngaul mayuh agensi enggau opis perintah, sebedau ngelawa taba Miri Kitchen ti meda orang dagang lokal ngenah bemacham pemakai enggau produk pemakai.

Iya enggau bini, Dato Baduyah Bujang mega sama nyepi pemakai asal baka ikan baung sumai kunyit, serabai enggau chuchur bubuk.

Hari keterubah program diisi enggau muka Miri Kitchen & Sales, seraya pemandang besai, kaunter servis sereta e-pekit diatur ba Bansal Sarawak Pavilion & Servis.

Muak ke lemai richah enggau bemacham aktiviti interaktif nyengkaum mini games, pekit ngelinsu, kuiz pemakai Sarawak sereta Lumba Rayat ti ngaul komuniti menua.

Nyau datai malam, pengusung deka beperindang enggau Malam Budaya Sarawak ti mai bala artis lokal sereta pemerindang main asal ti mandangka pengelain pesaka nengeri tu.

Batang program iya nya Pengerami Bejadi Program Sarawakku Sayang Bagi Menua Miri ti dipenyadika Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.

Sama datai, Sapit Sekretari Perintah Sarawak (Perambu Ekonomi enggau Pemansang) Dato Sri Dr. Muhammad Abdullah Zaidel, Sapit Sekretari Perintah Sarawak (Administrasyen) Datu Felicia Tan Ya Hua, Residen Miri Galong Luang sereta Direktor Unit Komunikasi Awam Sarawak (UKAS), Awang Putrayusrie Awang Redzuan enggau bala tuai opis bukai.-EDISI UKAS