BUKIT BEGUNAN: Pekit Bintang Kecil 4.0 ungkup sekula primari nengah Kunsil Nengeri (DUN) Bukit Begunan nyadi pelasar beguna dikena ngansah penau seni sereta nambah pengandal nembiak nengah pengawa belagu.

Program ti diatur kena Hari Lima ba Balai Panggau Dau, SK Selepong nya dipasuk 12 sekula ngelingi endur nya ke alai tiap sekula nganjung pengari ungkup kategori Primari Satu enggau Primari Dua.

Inisiatif ti dikemansang Kaban Kunsil Nengeri (ADUN) Bukit Begunan, Datuk Mong Dagang madah ke program nya dikemujur nengah kerejasama SK Selepong nyadi pengatur begulai enggau Gerempung Apai Indai enggau Pengajar (PIBG) sekula nya.

Pekit belagu nya ukai semina meri peluang ngagai nembiak mantai penau, tang mega ulih nambah pengelandik vokal sereta nempa pengandal entara bala penyereta.

Pia mega, program nya diatur dikena narak pengerindu ngagai seni muzik lalu nempa pengawa besemekih ti manah enggau kreatif entara nembiak.

Inisiatif nya mega dipeda ulih negap rega estetika muzik nengah penerang ngagai mayuh genre nyengkaum lagu irama Malaysia enggau Jaku English lalu nyaup nambah pengawa nguasa jaku kedua.

Pekit nya nerima timbal ti chukup manah ari komuniti lokal ti datai meri sukung, lalu mandangka pangku pengawa komuniti nyukung pemansang penau rebak biak.

Bisi 12 sekula ngambi bagi nyengkaum SK Bakong, SK Tanjung Bijat, SK Temudok Kem, SK Kem Pakit, SK Melugu, SK Selepong, SK Munggu Beringin, SK Selanjan, SK St. Martin (M), SK Chung Hua Bangkong, SK Engkeranji enggau SK St. Paul Banting (M).

Pekit nya lanchar dikemujur akim bepeneleba betuai ke Joannes Johnny Aman.

Program baka tu dikearap ulih ditampung dudi hari dikena nempa penau baru sereta negap pemereti ati enggau kreativiti nembiak ba Bukit Begunan. - EDISI UKAS