MIRI: Lebih 2,000 pengusung ngerichah Malam Budaya Sarawak ti diatur serimbai Program Sarawakku Sayang di Khemah Utama, Stadium Miri malam Hari Lima.

Program ti richah diatur nya mandang bemacham seni enggau budaya komuniti di nengeri tu nengah pemerindang tanda, muzik enggau belagu.

Malam Budaya Sarawak nya dipenyadi Menteri Dagang Temuai, Industri Kreatif enggau Seni Pemerindang Sarawak ti mega Menteri Nembiak, Lumba enggau Pemansang Orang Dagang Sarawak, Dato Sri Abdul Karim Rahman Hamzah.

Bela datai, Sapit Menteri Dagang Temuai, Industri Kreatif enggau Seni Pemerindang Sarawak (Dagang Temuai) ti mega Kaban Kunsil Nengeri (ADUN) Piasau, Datuk Sebastian Ting Chiew Yew, sereta Sapit Sekretari Perintah Sarawak (Administrasyen), Datu Felicia Tan Ya Hua, Sapit Residen Bagi Menua Miri Bujang Rahman Seli enggau temuai dipebasa bukai.

Pengerami dipun enggau pemerindang keterubah besuluka jaku “Sarawakku Sayang” sebedau ditampung enggau mayuh pemerindang main asal ari serakup enggau raban seni lokal di Miri.

Tu nyengkaum Tanda Bujang Berani ari Raban Damanai Kuwai, Tanda Kedayan ari Raban Kedayan Miri sereta Tanda Penan ari Gerempung Pemansang Tipun Penan Sarawak nyengkaum pemerindang richah ari Jatti Miriek Miri ti mandangka identiti etnik menua.

Pia mega, panggau nya richah diperindang penanyi menua baka Vior Eagle Crown, Menoah enggau Phoebe Chloe ti mujur narit ati mensia mayuh.

Program ditampung enggau pemerindang tanda ari Gerempung Indu Orang Ulu Miri ti mandangka Tanda Datun Julut, dientudi Ajat Iban ari 1 Beat Studio sereta Tanda China ari Arabesque Academy of Dance Miri.

Pengerami malam nya majak ranchak lebuh diperindang Raquel Then enggau Mawat, sebedau ditutup enggau pemerindang bemukun ari raban D’E Bayu enggau Culture Dance Miri ti ngasuh mensia mayuh chapuh. - EDISI UKAS