BINTULU: Pengawa ngatur program ngintu Gawai dipeda ngembuan besai reti dikena nyaga enggau nyagu pesaka budaya pupu bansa di Sarawak.

Menteri Dagang Temuai, Seni enggau Budaya Malaysia, Dato Sri Tiong King Sing madah, inisiatif nya beguna amat nentuka tradisyen enggau identiti budaya lokal terus ditan sereta ditampung rebak dudi.

Ku iya, Pengerami Gawai ukai semina pengerami asal komuniti Dayak, tang mega mandangka bemacham budaya ti nyadi penegap penyerakup rayat di nengeri tu.

“Malaysia nyadi menua diuan pupu bansa ti meseti semampai nyaga pengelantang nengah pengawa bela bebasa ke budaya enggau jalai pengarap pangan diri,” ku iya.

Iya madah munyi nya ba Program Mantar Gawai Opis Menteri Dagang Temuai, Seni enggau Budaya (MOTAC) @Komuniti N.69 Kemena di Restoran Dinnerworld ditu kena Hari Lima.

Dato Sri Tiong madah, pengawa ngatur program nya nyadi pelasar marit rebak biak ngembuan pengangkun ngagai pesaka budaya ngambi terus relevan ba arus pemansang moden.

Ku iya, inisiatif nya nipak agenda perintah negap sektor dagang temuai budaya kelebih agi serimbai Kimpin Nemuai Ke Malaysia 2026 ti dilanjar nyentuk 2027.

Nya kebuah, iya nyemetak madah ke pemesai guna kerejasama semua nentuka pesaka budaya enggau penyerakup komuniti terus dijaga. - EDISI UKAS