MUKAH: Program Negap Tuai Raban Bansa enggau Tuai Komuniti (KMKK) dipeda nyadi inisiatif beguna negap penau tuai ba renggat baruh, seraya nentuka atur komuniti lanchar, lurus enggau nemban agi.
Menteri ba Opis Premier Sarawak Dato Sri John Sikie Tayai madah, pengawa ngatur program baka nya ulih nambah penemu, pengelandik sereta penyikar KMKK ngesan tanggungpengawa sida ngagai komuniti.
Ku iya, pengawa negap beguna amat berindik ari pangku pengawa KMKK diatu majak mayuh pemar, kelebih agi nentuka pengelantang peranak semampai dijaga lalu pemansang genturung pendiau ulih dipejalai manah.
“Program tu meri awak ngagai KMKK nambah penemu sereta ngansah pengelandik nyadi tuai ngambi sida sedia agi napi pemar kemaya hari,” ku iya.
Iya madah munyi nya ba Pengawa Nangguh Program Negap KMKK Pelilih Selangau enggau Mukah di Kingwood Resort, ditu kena Hari Enam.
Nambah ke nya, Dato Sri John Sikie nyemetak madah, pengawa nyiri KMKK nya bepelasarka sukung enggau pengandal majoriti peranak lokal lalu mandangka tuai ti dikeandal mensia mayuh.
Berebak enggau nya, iya ti mega Kaban Kunsil Nengeri (ADUN) Kakus ngingatka pengawa nyiri ba Komiti Pemansang enggau Pengelikun Genturung Pendiau (JKKK) dipejalai chara inklusif nentuka semua komuniti ngambi bagi.
Iya mega ngarap tetiap KMKK ti dichiri ulih ngesan tanggungpengawa enggau manah sereta bisi integriti.
Nangkan nya, ADUN Balingian, Abdul Yakub Arbi muji atur program nya ti dipeda engkeman endar negap KMKK.
Ku iya, KMKK ukai semina nyadi jematan entara perintah enggau rayat, tang mega nyadi pugu penyerakup sereta pengelantang komuniti lokal.
Bela datai, Kaban Parlimen Selangau Edwin Banta, ADUN Tellian Royston Valentine, Pegawai Pelilih Selangau Yalin Asan sereta Pegawai Pelilih Mukah Peleadzman Ahip. - EDISI UKAS
