BAU: Premier Sarawak, Datuk Patinggi Tan Sri (Dr) Abang Abdul Rahman Zohari Tun Abang Openg disadang datai nyua urung 2,000 geran pala tanah ngagai peranak di Pelilih Bau kena 23 Jun ila.

Sapit Menteri Pengangkut Sarawak (Sungai enggau Tasik) ke mega Kaban Kunsil Nengeri (ADUN) Tasik Biru, Datuk Henry Harry Jinep madah, pengawa nya deka diatur serimbai pengerami bejadi Palan Main Asal Bidayuh (BCC) Bau.

Ku iya, inisiatif Perintah Sarawak meri geran pala tanah ngagai rayat dipejalai belama lalu ukai dikena beambi ulih ba politik aja.

“Perintah nengeri udah lama gawa nentuka tanah peranak bisi pala, kelebih agi Tanah Adat Bansa Asal (NCR), diaku enggau diberi,” ku iya.

Iya madah, menua Singai majak mayuh geran pala tanah diberi kenyau ari 2019, enggau beratus penerima bulih geran sida berenggat.

Iya nerang, inisiatif nya berengkah Januari 2019 di Kampung Sudoh enggau 636 geran disua ngagai sekeda genturung pendiau nyengkaum Kampung Daun, Kampung Tanjong Bowang enggau Kampung Senibung, kelimpah Rizab Komunal Bumiputera ungkup pengawa betanam betupi enggau lanting tuai.

Inisiatif nya ditampung Februari 2020 ba Kampung Bobak Sejinjang enggau 528 geran disua ngagai peranak ari Kampung Sudoh, Kampung Atas, Kampung Bobak Sajong enggau Kampung Daun.

Udah nya, September 2020, ke alai bisi 132 geran disua di Kampung Tanjong Poting ngaul sekeda genturung pendiau semak menua nya.

Bulan September 2022, sepenyampau 305 penerima nerima geran pala tanah sida empu ba pengawa diatur serimbai Panggau Pengerami Tasik Biru, ngaul peranak Kampung Barieng, Kampung Senibung enggau Kampung Skibang.

Seraya taun 2024, bisi 845 penerima datai ari Kampung Segong, Kampung Senibung, Kampung Tanjong Poting, Kampung Apar, Kampung Sibuluh, Kampung Atas enggau Kampung Grogo mega udah nerima geran pala tanah.

Datuk Henry nerangka pekara nya ba mua mayuh rambau pengawa nutup program ‘BiSingai Townhall’ diatur di Dewan Datuk Peter Nansian Ngusie, Kampung Apar Singai, Hari Minggu.

Ba pengawa ke sama, iya mega bisi nyua insentif pelajar penyampau RM39,100 ngagai 86 nembiak ari sitak DUN Tasik Biru ti nampung pelajar ngagai tikas matrikulasi, diploma enggau ijazah sarjana muda di institusyen pelajar tinggi.

Sama datai, Presiden REDEEMS, Datuk Peter Nansian Ngusie; Life President REDEEMS, Datuk Wilfred Rata Nissom; Sapit Presiden REDEEMS, Dr Les Met; Pegawai Pelilih Bau, Eddy Nayoi; Temenggong Komuniti Bidayuh Bagi Menua Kuching, Temenggong Atok Derop sereta Pemancha Komuniti Bidayuh Daerah Bau, Pemancha Robert Tom Juin.- EDISI UKAS