Nuansa Seni 2026 Ngelati Pesaka Melayu Sarawak Ke Panggau Global
KUCHING: Program NUANSA SENI 2026 datai baru enggau visyen nyengala agi sereta nyelinting nyagu seni pesaka Melayu Sarawak nyadi industri meruan ti ulih besemekih sereta relevan ba renggat global.
Diatur ngena rambai jaku “Golden Threads of Borneo: From Ancestral Hands to Global Eyes”, program ketujuh kali nya ukai semina mandangka seni aja, tang nyadi penyungkak pemansang ekosistem pesaka ti mungkur pengawa ngintu penulin, negap pemekuh seni sereta ngerembai makit ke renggat antarabansa.
Program nya richah enggau penatai Sapit Menteri Dagang Temuai, Industri Kreatif enggau Seni Pemerindang, Datuk Snowdan Lawan disempulang bini enggau Sekretari Mendam Opis Menteri nya, Morshidi Fredrick.
Direktor Program, Dr. Sharifah Suzana Wan Shukran madah, NUANSA SENI ada ari andal ke pesaka enda patut semina diintu aja, tang patut dibantai, disagu enggau dikerembai ngambi semampai relevan ba arus globalisasi.
“Nuansa Seni ukai semina mantaika pisin aja, tang kitai benung numbuh siti ekosistem ti nyambung tradisyen enggau inovasyen, budaya enggau makit global sereta pesaka enggau rebak baru,” ku iya lebuh bejaku ba program nya Hari Lima di Hotel Waterfront, Kuching.
Iya madah, program nya mega meri perati ngagai pemansang penau baru ari nyendiaka pelasar, peluang belajar enggau meri penemu ngagai komersialisasi produk seni pesaka.
Entara isi program nyengkaum pemerindang ngelalu, achara simbolik ngelanchar sereta mantaika pisin ti mai lapan penengkebang iya nya D Keringkan x Maskota, Ben Affiq, Melati Burlian ari Indonesia, Helmi Batik, Ben Nazry, Little Ummi ari Brunei Darussalam, Atma Nusa sereta HERA by Nurul Supardi.
Edisyen sekali tu mega ngena chara baru nengah ngatur Keringkam Masterclass kelimpah ngaul bala artis antarabansa ari Indonesia enggau Brunei Darussalam, seriris enggau juluk ngerembaika rentayan ngilah entara menua.
Nengah program berurun baka pemandang, woksyop, kolaborasi enggau kelas khas, NUANSA SENI nyadi pelasar strategik ti ngempuruka bala artis, penengkebang, pemekuh industri, raban ngaga polisi sereta komuniti ba pengawa negapka industri pesaka.
Inisiatif nya mega ngemeratka pemesai guna nentuka pemekuh seni ukai semina nyulur pengelandik asal aja, tang bulih penguntung ekonomi ti meruan enggau asi.
NUANSA SENI 2026 madah ke pengeransing semua raban ngintu enggau ngelati pesaka seni Melayu Sarawak ngambi majak ngerembai nyadi pemansut identiti, dikemegah enggau nilai ekonomi, sereta nusui jerita Borneo ke panggau dunya.- EDISI UKAS
