SERIAN: Semua projek pemansang di Bagi Menua Serian meseti digaga manah enggau nitih taga ditetap nentuka pemaik ulih diasai rayat lalu nadai penanggul laun.

Kaban Kunsil Nengeri (ADUN) Tebedu Dr Simon Sinang Bada madah, Bagi Menua Serian diatu benung deras mansang asil kerejasama semua raban nyengkaum nambah agih belanja pemansang nengah Program Transformasyen Menua Pesisir (RTP) sereta numbuh agensi baka Agensi Penyeraris Pemansang Greater Kuching (GKCDA).

“Aku ngansak semua tuai opis nentuka tetiap projek digaga manah enggau nitih taga dikena nyeliah projek tejanggal ti tau ngerugi rayat,” ku iya.

Iya nyebut jaku nya ba Pengerami Makai Lemai Apresiasi Administrasyen Bagi Menua Serian Taun 2026 Borneo Empurau Resort & Farm, ditu, Hari Empat.

Iya mega madah, integriti, lurus gawa enggau semangat gawa siti tim patut dikemeran ba orang gawa perintah.

Dr Simon madah baru, pengerami apresiasi nya pelasar besai siti-siti organisasyen ngaku pengawa, jasa enggau penyulut staf ti nyadi tiang sukung bejalaika polisi enggau pemansang perintah, lebih agi di Bagi Menua Serian.

Iya mega meri pengaga ati ngagai semua agensi perintah nyengkaum opis pelilih, Opis Kereja Raya (JKR), Opis Tanah enggau Survei (JTS) sereta agensi bukai ti bejalaika pangku pengawa besai ngatur pemansang sosioekonomi enggau penyangga penusah ba menua nya. -EDISI UKAS