Sapit Menteri Nembiak, Lumba enggau Pemansang Orang Dagang Sarawak Datuk Gerald Rentap Jabu madah, genap komuniti ngesan pangku pengawa besai ti nyukung pengawa pemansang ti dilanggur.
“Ngetan penegap ukai pengawa siku aja, tang pangku pengawa serap komuniti,” ku iya.
Iya nyebut jaku nya ba mua mayuh rambau Pengerami Makai Selamat Penghulu Sebastian Randy Kadam di Rumah Panjai Semumok Atas kena Hari Lima.
Iya ke mega Kaban Kunsil Nengeri (ADUN) Layar, kaul manah entara rayat enggau bala tuai ulih negap pengawa meri servis enggau nentuka tetiap inisiatif ti dilanggur ulih meri pemaik ngagai peranak.
Ba pengerami nya mega, Datuk Gerald nyemetak madah ke pemesai guna ngaga surat peminta ti silik enggau berurun ngambi peminta projek fasiliti tauka infrastruktur nyamai diadu.
Ku iya, penerang ti betul enggau silik deka mantu ngerumban pengawa nyerenih sereta bejalaika projek ungkup pengelantang begulai.
Kelimpah ari nya, iya mega beterima kasih ke penyiru rayat lebih agi raban nembiak ti majak mereti ke pemansang menua sereta meri sadang penemu ngena chara ti patut.
Seraya Kaban Parlimen Betong, Dato Dr Richard Rapu madah ke pengawa negap pemansang menua majak dipejalai nengah kerejasama semua raban.
Ku iya, mayuh chara dikena nyengkaum ngelala pemansut belanja dikena nyukung pemansang sereta program nambahka sosioekonomi peranak.
Iya mega madah, raban sida seruran nerima penemu enggau timbal ari rayat nentuka tetiap peminta ulih diberi perati nitih pematut.-EDISI UKAS
