KANOWIT: Projek ngaga jalai alun beungkus lebih RM123 juta ti nyambung Skim Pengentap Pendiau Baru (SPS) Ngungun ngagai SPS Jagau dikeandal nyadi penyungkak nambah ke rentayan penyambung sereta aksesibiliti peranak ba menua ulu.

Kaban Kunsil Nengeri (ADUN) Ngemah, Anyi Jana madah, projek nya dipejalai berenggat ngaul sekeda agensi perintah nentuka projek digaga nyerangkung semua enggau meruan.

Iya nyebut jaku nya lebuh dirandau pemberita ba Program Hari Diri Sebilik Tuai Raban Bansa enggau Tuai Komuniti Ngemah Tengah enggau Ngemah Hilir di Karangan Nanga Bat kena Hari Lima.

Ku iya, renggat keterubah ngaul jalai SPS Ngungun ke Nanga Bat sepanjai 4.3 kilometer di baruh Opis Menteri Pemansang Genturung Pendiau enggau Kandang Menua (KKDW) beungkus lebih RM37.79 juta udah ditinda 25 Februari 2026.

Iya madah, projek nya diatu benung mutar sekeda pekara tenikal nyengkaum mayar tanah diadu Opis Tanah enggau Survei.

Ba jalai Nanga Bat ke Nanga Pra sepanjai 8 kilometer di baruh Upper Rajang Development Agency (URDA), projek beungkus RM86 juta itu nya udah manggai 86 peratus.

Ngenang pekara sama, renggat nangkan nya ari Nanga Pra ke Nanga Jagau dipelaba ditinda suku ketiga taun 2026, bepanggai ba taga projek ari Opis Kereja Raya (JKR).

Kelimpah ari nya, siti da projek sepanjai 7 kilometer ngaul jalai tama ke Simpang Jagau deka ditinda enda lama da dikena ngenapka rentayan jalai ba menua nya.

Ungkup pengawa timpuh pandak, perintah nengeri deka ngadu ke jalai batang ke bisi ngambi bisi ditengah peranak mindah seraya nganti semua projek jalai nya tembu ila.

Projek nya dikeandal meri empas besai ngagai pemansang sosioekonomi menua ari nambahka mobiliti, ngemuntang akses ngagai servis pemun sereta merangsang aktiviti ekonomi ba menua ulu.-EDISI UKAS