MIRI: Penyerakup enggau basa entara pengarap nyadi kunchi pengering Sarawak.

Menteri Pengangkut Sarawak ke mega Kaban Kunsil Nengeri (ADUN) Senadin, Dato Sri Lee Kim Shin madah, rayat patut majak narak ulah bebasa ke pengarap sereta ngetan pengelantang ba pengidup begulai ti udah nyadi identiti nyelai Sarawak.

Ku iya, Hari Wesak diintu ukai semina signifikan ngagai raban bepengarap Buddha aja, tang narak penemu pasal pematut ngemetul ulah diri, pengasih ke mensia enggau gawa ke pengelantang rayat.

“Nadai ngira peninggi penuduk tauka pengaya enggau pengeraja kitai, tang semua kitai deka pulai ngagai jalai ke sama.

“Nya alai, sekumbang idup, kitai meseti ngereja pemanah enggau mantu rayat,” ku iya lebuh ngulu mantar Hari Wesak diatur Serakup Buddha Mi Tuo Jin Yuan Miri, ditu, Hari Lima.

Iya mega madah, dunya diatu napi mayuh pemar ketegal penyarut enggau perang ti meri empas ngagai ekonomi global sereta pengidup rayat, lalu madah ke pemesai guna ngetan pengelikun enggau penegap.

Ngenang silik, iya madah ke Perintah Sarawak mekuh polisi inklusif ti gawa ke semua pengarap, nyengkaum meri agih belanja khas ungkup pemansang enggau ngintu rumah sembiang ukai Islam nengah Unit Pekara Pengarap Bukai (UNIFOR).

“Ba taun siti nyin aja, Perintah Sarawak udah ngagihka urung RM90 juta dikena mantu mayuh organisasyen pengarap ba selampur nengeri,” terang iya. -EDISI UKAS