DARO: Projek empat iti jematan di Pulau Bruit disadang ulih tumu agi tembu ari timpuh ke dilanggur.

Projek tu iya nya Jematan Penipah, Penuai, Betanak enggau Salah Kechil digaga enggau mujur kelimpah bela bekenaka teknologi moden.

Sapit Menteri ba Opis Premier Sarawak (Pekara Korporat, Pemadah enggau UKAS) ke mega Kaban Kunsil Nengeri (ADUN) Semop Datuk Abdullah Saidol madah, projek nya digaga ketegal ngira pengelantang rayat menua pesisir.

"Projek tu digaga nitihka guna peranak Pulau Bruit lalu kitai meda projek tu ulih tumu agi tembu," ku iya maya ngabas projek nya ba Kampung Penipah ditu, Hari Dua.

Nangkan nya, Sapit Menteri Pemansang Infrastruktur enggau Pemansang Penyangkai Kapal Sarawak, Datuk Ir. Aidel Lariwoo madah, projek nya digaga ngena teknologi 'ultra high performance concrete' (UHPC) ke dipeda ulih ngerumban agi penembu projek.

Ku iya, teknologi nya ukai semina nentuka pengetan struktur tang pengawa ngaga ulih dipejalaika enggau efisyen agi enti dibanding enggau chara lama.

"Teknologi tu ulih nentuka projek digaga enggau lengkas agi lalu nentu struktur jematan tegap sereta tan agi," ku iya madah.-EDISI UKAS