SEDI: Projek infrastruktur nyengkaum ngaga jematan di menua pesisir semampai deka disungkakka agi dikena nentu pengelantang rayat mayuh.

Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol madah, pekara nya dipandang maya ngabas palan projek nyengkaum ngabas projek Jematan Batang Paloh ke disadang tembu enda lama agi.

Ku iya, beberapa bengkah projek jematan mit bela digaga di menua nya baka ba utara Pulau Bruit.

"Kelimpah ari nya, projek ngaga jalai baru bela dilanggur ungkup pengelantang rayat mayuh alai ngelama tu sida agi nengah jalai ladang ngelawa jalai besai," ku iya madah maya program begulai enggau rayat di Kampung Sedi, Daro, Hari Dua tu tadi.

Iya ke mega Kaban Kunsil Nengeri (ADUN) Semop madah, penembu projek nya ila ukai semina mai pengelantang ngagai rayat mindah tang badu agi ngena feri.

Kelimpah ari nya, iya Datuk Abdullah madah, pemansang infrastruktur ke digaga betandu bela ngerandang mayuh agi penumbuh pun penatai ekonomi ti deka ngangkatka tikas pengidup rayat.

Ba pengawa nya, iya nengah program Tanggungpengawa Rama Korporat (CSR) bisi ngungkupka belanja RM10,000 ngagai tiap Komiti Pemansang enggau Pengelikun Genturung Pendiau (JKKK) Sedi enggau JKKK Rumah Jingga dikena nyaup ngatur program sida.-EDISI UKAS