DARO: Projek jematan baka Jematan Batang Paloh, Batang Igan enggau Batang Lassa ngubah pemansang sistem rentayan jalai di Tanjung Manis, Pulau Bruit datai di Mukah.

Sapit Menteri ba Opis Premier Sarawak (Pekara Korporat, Pemadah enggau UKAS) Datuk Abdullah Saidol madah, pemansang nya besai reti ba rayat ukai semina ketegal pemansang bekaul jalai tang bela ngira deka ngerumban integrasyen ekonomi menua pesisir.

Ku iya, pemansang nya bela nyukung pemansang agropark sereta nyungkak pengawa ngasilka pemakai ari menua pesisir.

"Jalai enggau jematan ngerandang mayuh agi peluang ekonomi ngagai rayat menua pesisir ti deka ngangkatka tikas pengidup sida," ku iya maya ngabas projek Jematan Batang Paloh, Hari Dua tu tadi.

Kaban Kunsil Nengeri (ADUN) Semop nya madah, perintah ngerumban ngaga projek infrastruktur ngambika ulih nyempilka agi seraka pemansang menua pesisir enggau mengeri.

Ku iya, pekara nya bela ngemuntangka agi rayat ngemansangka tanah sida lalu nambah penatai pemisi diri.

Iya andal ari penembu projek jematan, projek pemansang bukai deka datai nyengkaum nambahka agi pemanah sistem bekal ai di menua pesisir. -EDISI UKAS