DARO: Projek pemansang jematan besai di Sarawak deka ngemanah sereta nambah akses jalai nengeri seraya meransang pengerembai ekonomi sereta pemansang menua pesisir.

Sapit Menteri Infrastruktur enggau Pemansang Penyangkai Kapal Sarawak, Datuk Ir. Aidel Lariwoo madah, naka ke diatu bisi 10 jematan besai udah tembu lalu lapan iti agi benung digaga sereta disadang ulih tembu enda lama agi.

Ku iya, projek nya digaga nengah inisiatif Jalai Nebing Tasik enggau Second Trunk Road ti deka nyungkakka tikas aksesibiliti rayat di selampur nengeri.

"Tebal agi projek tu digaga enggau mujur nitih langgur timpuh lalu nadai isu besai nyadi nyengkaum beberapa iti projek jematan besai ke disadang tembu taun tu," ku iya maya ngabas projek Jematan Batang Paloh, Hari Dua tu tadi.

Iya mega madah, projek besai nya ukai semina ngemuntangka agi penyauh pejalai tang bela dipeda deka nyungkakka agi ekonomi rayat baka ba sektor berikan, betanam betupi sereta dagang mit enggau jelan pemesai.

"Ari penembu projek tu, ungkus logistik deka dikurangka agi lalu ulih ngangkatka tikas pemanah produk menua tu ba makit dagang," ku iya madah baru.

Kelimpah ari nya, iya madah, Perintah Sarawak semampai ransing nentu tiap bengkah projek digaga bepelasarka langgur ke udah ditetap sereta ngemeratka pengelikun ungkup timpuh panjai. -EDISI UKAS