Hungary Deka Suah Agi Ngambi Bagi Ba Program Di Sarawak
KUCHING: Hungary deka suah agi ngambi bagi ba program ke diatur Sarawak bekaul inisiatif strategik baka dagang temuai, pelajar, pengawa mansik enggau budaya.
Duta Besai Hungary ke Malaysia Dr Sandos Sipos madah, tu nyadi chara baru ke lebih agi berurun dikena ngenegap kaul dua buah menua.
"Dudi hari, Hungary berunding baka ni chakah agi ngaul program di Kuching lalu bulan Jun tu kami deka ngatur program begulai enggau Library Nengeri Sarawak.
"Kami mega bisi ati deka ngambi bagi ba program ke diatur Opis Dagang Temuai Sarawak baka festival jazz bulan Disember tu ila lalu nyangka mega deka nganjung raban muzik enggau tanda rakyat Hungary ke Kuching maya Rainforest World Music Festival (RWMF) taun siti agi," ku iya madah.
Iya nerangka pekara nya ba aum media sepengudah ngatur penemuai basa ngagai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg di Kompleks Satria Pertiwi ditu, Hari Tiga.
Ba pekara pelajar ku iya, Hungary deka majakka kerejasama nyengkaum nyendiaka 40 sekulaship ungkup nembiak Malaysia ba renggat universiti ba pelajar Inggeris sereta nyungkakka agi kerejasama institusyen pelajar dua buah menua tu.
"Kelimpah ari nya, kami udah nentuka siti bidang pengawa mansik ke ulih digaga bekaul biodiversiti iya nya baka ni rampa menua Sarawak tau diserungkaika agi ngambi pulaika pemaik," ku iya madah baru.
Iya mega madah, Muzium Etnografi Hungary enggau Muzium Budaya Borneo besetuju deka ngatur program pemandang taun siti agi.
Bela datai maya nya Sapit Menteri Dagang Temuai, Industri Kreatif enggau Seni Pemerindang Sarawak Datuk Sebastian Ting Chiew Yew, Sapit Sekretari Perintah Sarawak (Pengatur Ekonomi enggau Pemansang) Dato Sri Dr Muhammad Abdullah Zaidel, Direktor Opis Wilayah Sarawak Opis Menteri Luar Nengeri Malaysia Malaysia Dato Fenny Nuli enggau Sapit Sekretari Mendam Opis Menteri Dagang Temuai, Industri Kreatif enggau Seni Pemerindang Sarawak (MTCP) Julin Alen. -EDISI UKAS
