SELANGAU: Perintah Sarawak nengah Kaunsil Pemansang Pengawa Berumah (HDC) udah ngemendarka jali RM4 juta ngagai empat projek ba sitak Kunsil Nengeri (DUN) Kakus taun tu.

Menteri ba Opis Premier Sarawak Dato Sri John Sikie Tayai madah, agih belanja nya sebagi ari pengeran perintah mantu rayat bisi rumah ti lantang agi, lebih agi ngentak rumah panjai baru.

Ku iya, bantu HDC ngaul agih belanja RM10 juta ari Perintah Besai seraya RM50 juta ari Perintah Sarawak.

Ku iya, ari 2018 nyentuk 2025, sepenyampau RM7.34 juta udah diberi Perintah Besai seraya RM21.779 juta ari Perintah Sarawak.

“Nentuka mayuh agi rayat bulih pemaik ari inisiatif tu, penerima jali dipinta mayar belama jali nya ngambi ulih diberi ngagai peminta bukai,” ku iya ba Pengawa Tuai Enggau Rayat sereta kelai bejadi ngentak rumah panjai baru di Rumah Kunjan Anti, ditu, Hari Empat.

Iya mega ngelalau peranak minta kenuku ari Opis Tanah enggau Survei sebedau ngentak rumah panjai nentuka taba engkeman sereta nyeliah sebarang pengawa masau belanja.

Ngenang pekara bekaul, Dato Sri John Sikie ke mega Kaban Kunsil Nengeri (ADUN) Kakus madah ke sitak dipegai iya bela nerima mayuh pemansang nengah ‘Mid Rajang Regional Development Agency’ (MiRRDA) ke alai agih belanja RM1 bilion ungkup projek infrastruktur sereta RM500 juta ngemansangka sektor betanam betupi nyengkaum sawit, kupi enggau nupi jelu.

Ba pengawa ke sama, iya bisi ngemendarka geran Projek Mit Pemansang Menua Pesisir (MRP) penyampau RM19,000 ngagai Komiti Pemansang enggau Pengelikun Genturung Pendiau (JKKK) ngaul 19 pintu, kelimpah bantu Program Nyeruri Rumah Seranta Sarawak (PPRMS) sepenyampau RM4,000 sepintu.

Seraya Kaban Parlimen Selangau, Edwin Banta lebuh bejaku meransang rayat majak meri kerejasama ngambi agenda pemansang ba menua nya mujur.

Iya mega ngemendarka agih belanja RM10,000 ngagai biro indu sereta bantu ramu berega RM15,000 kena nyaup ngentak rumah panjai nya.

Sama datai, pengari Opis Pelilih Selangau Welson Malian enggau Pegawai HDC Brandon De Frank. -EDISI UKAS