KUCHING: Perintah Sarawak meri terima kasih ngagai semua raban ti nentuka pekit Lumba Malaysia (SUKMA) taun tu ulih diatur, taja diatur jelan pemesai ba Selangor bulan Ogos ila.

Menteri Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah madah, pemutus ngatur pekit nya chukup manah laban semua nengeri udah besikap lalu ba renggat kepenudi latih.

“Alhamdulillah, aku chukup gaga lalu deka meri terima kasih besai ngagai Tuanku Sultan Selangor, Sultan Sharafuddin Idris Shah, Opis Menteri Nembiak enggau Lumba, menteri iya, (Dr Taufiq Johari) sereta Exco Negeri Selangor laban mujur nentuka pekit tu ulih diatur,” ku iya.

Iya nyebut jaku nya ba Pengawa Bejadi Pekit Futsal Trofi Presiden Gerempung Nembiak Nasional Besatu Sarawak (SABERKAS) SABERKAS di Arena Sukan Simpang Tiga, ditu, Hari Lima.

Iya madah, pengawa ngatur jelan pemesai sekali tu, enggau pengawa bejadi enggau nutup deka diinsur ngagai tikas pemadu minimum, nyengkaum raban voluntia ti asal suba 30,000 iku dikurang ngagai 5,000 iku aja.

Taja pia ku iya, achara lumba enggau main nadai berubah lalu semua dipekit nentuka semua atlit ulih nurun bepekit ba kelang diri empu.

Iya ngarap ke token bala atlit baka duit belanja sereta makai enggau ngirup enda dikurang ngambi enda meri sebarang penanggul.

Ngenang pasal pengawa Sarawak besikap, Dato Sri Abdul Karim madah, kem latih deka berengkah minggu baru sebedau mupuk kin.

“Tu nunjukka pengawa kitai besikap udah ba tikas kepenudi. Bilik, homestay enggau ke bukai mega udah diadu, lalu bayar chengkeram mega udah dibayar,” terang iya.

Sama datai, Kaban Kunsil Nengeri (ADUN) Daro ke mega Sekretari Besai SABERKAS Dr Safiee Ahmad, Senator Dato’ Ahmad Dato’ Sri Ibrahim sereta temuai dipebasa bukai.-EDISI UKAS