SARIKEI: Sepenyampau 209 pintu rumah panjai di Sarikei nerima projek ngadu ke dikeandal nambah pengelantang enggau tikas pengidup peranak ba menua nya.

Sapit Menteri Kebun Dandang Besai enggau Komoditi ke mega Kaban Parlimen Sarikei, Dato’ Sri Huang Tiong Sii madah, projek nya ngayanka perintah seruran naka ulih gawa nentuka pengelantang peranak rumah panjai dijaga.

“Perintah seruran ransing nentuka pengelantang peranak rumah panjai seruran diperati nengah bemacham projek dipejalai baka Program Transformasyen Menua Pesisir (RTP), Program Ngadu Rumah Seranta Sarawak (PPRMS) enggau Projek Mesra Rakyat (PMR) sereta ke bukai,” terang iya.

Iya nerang pekara nya lebuh ngatur pejalai ngundang sekeda rumah panjai di Sarikei sereta ngemata pengawa nyerah projek pintu ngagai peranak, empai lama.

Entara rumah panjai dilawa baka Rumah Roslie Atul di Jalai Kim San, Rumah Anthony Suding, Rumah Man Sulang, Rumah Doris Baling enggau Rumah Didong Barak di Simpang Koko Sungai Paoh sereta Rumah Stie Ubong di Ulu Bayong Sungai Tapang.

Ba pejalai nya, sekeda rumah panjai semak Jalai Kim San, Simpang Koko, Sungai Paoh enggau Ulu Bayong di Sungai Tapang iya nya Rumah Rosita Kuan, Rumah Jen Jimmy, Rumah Lamban Muchoi, Rumah Tracy James, Rumah Steve Rau, Rumah Jimboon Embol, Rumah Sebu Kijon, Rumah Kilau Grenang, Rumah Roseni Ngkarong enggau Rumah Assun Uping bela nerima projek pintu nya.

Iya ke mega Kaban Kunsil Nengeri (ADUN) Repok meransang peranak rumah panjai nganjung peminta ngagai Kaunsil Pemansang Pengawa Berumah (HDC) Sarawak di baruh Skim Jali Rumah Panjai dikena ngentak rumah panjai baru.

“Inisiatif tu peluang chukup manah peranak rumah panjai ulih diau ba rumah ti likun, lantang enggau meruan agi, sereta ngangkatka tikas idup enggau pengelantang peranak menua pesisir,” ku iya.-EDISI UKAS