TELANG USAN: Projek ngadu ke jalai batang lama ari Long Aya ke Long Sobeng deka ditampung ke Long Puah enggau menua ngelingi nya.
Kaban Kunsil Nengeri (ADUN) Telang Usan, Dato Dennis Ngau madah, projek di baruh Agensi Pemansang Tanah Tinggi (HDA) nya entara projek dikemeratka perintah nengeri dikena nambahka rentayan jalai penyambung ba menua ulu.
“Taja projek nya udah dilanggur kenyau ari 2018 lalu napi mayuh penanggul nyengkaum gaya menua ti bebukit, penekul logistik sereta belanja besai, tang perintah tetap ransing ngamatka langgur nya.
“Tu ngayanka perintah nadai kala nejuka utai diguna rayat ba menua ulu, tang majak gawa nentuka tetiap langgur pemansang ulih digaga,” ku iya.
Iya nyebut jaku nya ba mua mayuh rambau pengawa nasih tanah Projek Perambu Ngadu Jalai Ke Bisi ari Simpang Lapok ke Long Puah, Hari Empat.
Long Aya urung 3 jam setengah pejalai ngena entukar pikap ari Miri ngerenchah jalai batang lama.
Ke penemu, jalai nya sebagi ari 1,630 semua jalai batang ke bisi di Telang Usan.
Projek ngaduka jalai sepanjai 35 kilometer beungkus RM133.4 juta disadang tembu 30 bulan.
Dato Dennis mega meri terima kasih ngagai bala tuai genturung pendiau sereta peranak Ulu Tinjar ti liat ati nganti sereta mereti ke nama kebuah projek nya laun diadu.
“Taja projek suah nyadi ke umpan politik maya pengawa bepilih, tang rayat ditu tetap nganti enggau liat ati sereta ngelempaika pengandal ngagai perintah. Pengepuh sida ditu mansutka asil diatu,” ku iya. – EDISI UKAS
